തിരുവനന്തപുരം: കോൺഗ്രസ് ബിജെപിയിലേക്കുള്ള വഴിയായി മാറിയെന്ന് സിപിഐഎം സംസ്ഥാന സെക്രട്ടറിയറ്റംഗം എം. സ്വരാജ്. തെരഞ്ഞെടുപ്പിൽ ജയിച്ചാലും തോറ്റാലും കോൺഗ്രസ് നേതാക്കൾ ബിജെപിയിൽ ചേരുന്ന പ്രവണതയാണുള്ളതെന്നും അദ്ദേഹം വാർത്താസമ്മേളനത്തിൽ പറഞ്ഞു.
ചരിത്രപരമായി വിവിധ സംസ്ഥാനങ്ങളിൽ കോൺഗ്രസ് എംഎൽഎമാർ ബിജെപിയിൽ ചേർന്ന സംഭവങ്ങൾ ചൂണ്ടിക്കാട്ടിയാണ് സ്വരാജിന്റെ വിമർശനം. ഗോവ, അരുണാചൽ പ്രദേശ്, കർണാടക, ഉത്തരാഖണ്ഡ് തുടങ്ങിയ സംസ്ഥാനങ്ങളിൽ കോൺഗ്രസ് വിജയിച്ച അംഗങ്ങൾ പിന്നീട് ബിജെപിയിൽ ചേർന്നതായും അദ്ദേഹം ആരോപിച്ചു.
ജയിച്ചാലും ബിജെപിയിലേക്ക് ചേക്കേറുന്ന പ്രവണതയാണ് കോൺഗ്രസിൽ കാണുന്നതെന്നും, മുൻ മുഖ്യമന്ത്രിമാരടക്കം നിരവധി നേതാക്കൾ ഇതിനകം ബിജെപിയിലേക്ക് മാറിയതായും സ്വരാജ് കൂട്ടിച്ചേർത്തു. കേരളത്തിൽ കോൺഗ്രസ് തോറ്റാൽ ബിജെപിയിലേക്ക് പോകുമെന്ന ആശങ്ക വേണ്ടെന്നും, ജയിച്ചാലും അത്തരമൊരു സാഹചര്യം ഉണ്ടാകാമെന്നുമാണ് അദ്ദേഹത്തിന്റെ പരാമർശം.
