കോഴിക്കോട്: താമരശ്ശേരി ചുരത്തിൽ എട്ടാം വളവിൽ മരം കയറ്റുന്നതിനിടെ ക്രെയിൻ മറിഞ്ഞു. സാരമായ പരിക്കേറ്റ ഡ്രൈവറെ ആശുപത്രിയിൽ പ്രവേശിപ്പിച്ചു. ക്രെയിൻ മറിഞ്ഞത് കാരണം രൂക്ഷമായ ഗതാഗത തടസം നേരിടുന്നുണ്ട്. നിലവിൽ ലക്കിടിയിൽ കവാടത്തിൽ നിന്നും താഴേക്ക് വാഹനങ്ങൾ കടത്തി വിടുന്നില്ല.
ക്രെയിൻ മറിഞ്ഞ സ്ഥലത്ത് റോഡിലേക്ക് ഓയിൽ ഒഴുകിയത് കാരണം വാഹനങ്ങൾ കടന്ന് പോവുകയില്ല. ഓയിൽ റോഡിൽ നിന്നും നീക്കം ചെയ്യാൻ ഫയർഫോഴ്സ് സംഭവസ്ഥലത്ത് എത്തിയിട്ടുണ്ട്. അപകടത്തിൽപെട്ട ക്രെയിൻ ഉയർത്താനുള്ള ക്രെയിൻ എത്തുന്നതേയുള്ളു. ചുരത്തിലുള്ള ഗതാഗത തടസം കാരണമാണ് ക്രെയിൻ എത്താൻ വൈകുന്നത്. അപകടത്തിൽപെട്ട ക്രെയിൻ ഉയർത്തി കഴിഞ്ഞാൽ ഇന്ന് മരം കയറ്റുന്ന ജോലികൾ തുടരാൻ സാധിക്കില്ലെന്ന് അധികൃതർ അറിയിച്ചു. ലക്കിടിയിലും അടിവാരത്തിലുമായി രൂക്ഷമായ ഗതാഗത തടസ്സമാണ് നേരിടുന്നത്. യാത്രക്കാർ മുന്നൊരുക്കങ്ങളോടെ മാത്രം യാത്ര ചെയ്യുക.
