പത്തനംതിട്ട: നീറ്റ് പരീക്ഷയിൽ വ്യാജ ടിക്കറ്റുമായി എത്തിയ സംഭവത്തില് കുറ്റം സമ്മതിച്ച് അക്ഷയ സെന്റര് ജീവനക്കാരി. തിരുപുറം സ്വദേശി ഗ്രീഷ്മയാണ് കുറ്റം സമ്മതിച്ചത്. തനിക്ക് ഹാള് ടിക്കറ്റ് എടുത്ത് നല്കിയത് അക്ഷയ സെന്റര് ജീവനക്കാരി ഗ്രീഷ്മയാണെന്ന് വിദ്യാര്ത്ഥി മൊഴി നല്കിയിരുന്നു.
വിദ്യാർത്ഥിയുടെ മൊഴിയുടെ അടിസ്ഥാനത്തിൽ പത്തനംതിട്ട പൊലീസ് നെയ്യാറ്റിന്കരയില് എത്തി ഗ്രീഷ്മയെ ചോദ്യം ചെയ്തത്. ഇതോടെ ഇവര് കുറ്റം സമ്മതിക്കുകയായിരുന്നു. നെയ്യാറ്റിന്കരയിലെ അക്ഷയ കേന്ദ്രത്തിലാണ് വ്യാജ ഹാള്ടിക്കറ്റ് ഉണ്ടാക്കിയത്.
വിദ്യാര്ത്ഥിയുടെ അമ്മ നീറ്റ് പരീക്ഷയ്ക്ക് അപേക്ഷിക്കാന് അക്ഷയ സെന്ററില് എത്തി. എന്നാല് താന് അപേക്ഷ നല്കാന് മറന്നുപോയെന്നും പിന്നീട് ഹാള് ടിക്കറ്റ് എടുക്കാന് കുട്ടിയുടെ അമ്മ എത്തിയപ്പോള് വ്യാജ ഹാള്ടിക്കറ്റ് തയ്യാറാക്കി നല്കുകയായിരുന്നുവെന്നുമാണ് ഗ്രീഷ്മ പൊലീസിനോട് പറഞ്ഞത്.
