ന്യൂഡൽഹി: നിലവിൽ ലോകത്ത് ഏറ്റവും കൂടുതൽ ചൂട് അനുഭവപ്പെടുന്ന 100 നഗരങ്ങളിൽ 98 എണ്ണവും ഇന്ത്യയിലെന്ന് കണക്കുകൾ. ഇതിൽ മിക്ക ഇന്ത്യൻ നഗരങ്ങളിലും താപനില 45 ഡിഗ്രി സെൽഷ്യസ് കടന്നു. പ്രധാന നഗരങ്ങൾ മാത്രമല്ല, ചെറിയ പട്ടണങ്ങളുമെല്ലാം ഉഷ്ണതരം​ഗത്തിൽ വെന്തുരുകുകയാണ്.

എക്യുഐ റിപ്പോർട്ട് പ്രകാരം ഉത്തർപ്രദേശ്, ഒഡിഷ, ബിഹാർ, മധ്യപ്രദേശ് തുടങ്ങിയ സംസ്ഥാനങ്ങളിലെ ന​ഗരങ്ങളിലാണ് ചൂട് കൂടുതൽ. ശനിയാഴ്ചത്തെ കണക്ക് അനുസരിച്ച് 46 ഡിഗ്രി സെൽഷ്യസ് രേഖപ്പെടുത്തിയ ഉത്തർപ്രദേശിലെ ബിന്ദ്കിയാണ് ലോകത്തിൽ ഏറ്റവും ചൂട് കൂടിയ ന​ഗരം. ഉത്തർപ്രദേശിലെ തന്നെ ഫത്തേപ്പൂർ, ഇറ്റാവ എന്നീ ന​​ഗരങ്ങളാണ് രണ്ടും മൂന്നും സ്ഥാനങ്ങളിൽ. ഇവിടങ്ങളിലും 46 ഡിഗ്രി സെൽഷ്യസ് ആണ് താപനില.

100 ന​ഗരങ്ങളിലെ പട്ടികയിൽ നേപ്പാളിലെ ന​ഗരങ്ങളായ ധർ​ഗധി 57-ാം സ്ഥാനത്തും, ലുംബിനി 94-ാം സ്ഥാനത്തുമാണ്. ഇവയൊഴികെ പട്ടികയിൽ ഉള്ള 98 ന​ഗരങ്ങളും ഇന്ത്യയിലാണ്. ഉത്തരാഖണ്ഡിലെ റൂർക്കിയാണ് 100-ാം സ്ഥാനത്തുള്ളത്. ഇവിടെ 44 ഡിഗ്രി സെൽഷ്യസ് ചൂടാണ് രേഖപ്പെടുത്തിയിട്ടുള്ളത്.