ജാര്ഖണ്ഡില് സ്ഥാനാര്ഥി പ്രഖ്യാപനത്തിന് പിന്നാലെ എംഎല്എമാരുള്പ്പെടെ പത്തോളം പേര് ബിജെപി വിട്ടു. മുന് മുഖ്യമന്ത്രി അര്ജുന് മുണ്ടയുടെ ഭാര്യക്കും, ചാമ്പയ് സോറന്റെ മകനും സീറ്റ് നല്കിയതിനെ ചൊല്ലിയാണ് ജാര്ഖണ്ഡിലെ ബിജെപിയില് തര്ക്കം ആരംഭിച്ചത്. സ്ഥാനാര്ത്ഥി നിര്ണ്ണയത്തില് കുടുംബ വാഴ്ചയെന്ന് ആരോപിച്ചാണ് നേതാക്കളുടെ രാജി.
മുന് മുഖ്യമന്ത്രി രഘുബര്ദാസിന്റെ മരുമകള്ക്കും ബിജെപി സീറ്റ് നല്കിയിരുന്നു. ഇതോടെ ബിജെപിയില് പൊട്ടിത്തെറിയുണ്ടായി. ഇത് പാര്ട്ടി പ്രവര്ത്തകരോടുള്ള വഞ്ചനയാണെന്നും പ്രവര്ത്തകര് പറഞ്ഞു. ജാര്ഖണ്ഡ് നിയമസഭാ തിരഞ്ഞെടുപ്പില് 21 സീറ്റുകളിലേക്കാണ് കോണ്ഗ്രസ് സ്ഥാനാര്ഥികളെ പ്രഖ്യാപിച്ചത്.
ജെഎംഎം കോണ്ഗ്രസ്സ് പാര്ട്ടികള് ചേര്ന്ന് 70 സീറ്റുകളില് മത്സരിക്കുമെന്നാണ് ഇന്ഡ്യ മുന്നണിയുടെ പ്രഖ്യാപനം. ബാക്കി സീറ്റുകള് ആര്ജെഡിക്കും കമ്മ്യൂണിസ്റ്റ് പാര്ട്ടികള്ക്കും നല്കാന് ധാരണയായിരുന്നു. ആര്ജെഡിക്ക് 7 സീറ്റും ഇടത് പാര്ട്ടികള്ക്ക് 4 സീറ്റുമാണ് നല്കിയിരിക്കുന്നത്. സീറ്റ് വിഭജനം സംബന്ധിച്ച് ഇന്ത്യ മുന്നണിയിലും അസ്വാരസ്യങ്ങള് നിലനില്ക്കുന്നുണ്ടെന്നാണ് പുറത്ത് വരുന്ന റിപ്പോര്ട്ടുകള് പുറത്ത് വരുന്നത്.
ജെഎംഎം 41 സീറ്റിലും കോണ്ഗ്രസ് 29 സീറ്റിലുമാണ് മത്സരിക്കുന്നത്. എന്നാല് ആര്ജെഡിക്ക് 7 സീറ്റുകള്ക്ക് പകരം 16 സീറ്റുകള് വേണമെന്ന ആവശ്യമാണ് ഉയരുന്നത്. എന്നാല് കഴിഞ്ഞ തവണത്തേക്കാള് കുറഞ്ഞ സീറ്റില് മത്സരിക്കുന്ന കോണ്ഗ്രസ് 41 സീറ്റില് മത്സരിക്കുന്ന ജെഎംഎമിനോട് സീറ്റ് വിട്ടു നല്കാനുളള ആവശ്യമാണ് ഉയര്ത്തുന്നത്.
