കേരളത്തിൽ വേനൽ കടുക്കുന്നതോടെ ചൂട് സഹിക്കവയ്യാതെ മാളങ്ങളിൽ നിന്നും പാമ്പുകൾ വീടിനുള്ളിലേക്കും പരിസരങ്ങളിലേക്കും ഇറങ്ങുന്നത് പതിവാകുകയാണ്. പാമ്പ് കടിയേറ്റുള്ള മരണങ്ങളും അപകടങ്ങളും റിപ്പോർട്ട് ചെയ്യുന്ന വാർത്തകൾക്കിടയിലാണ് ഇപ്പോൾ സോഷ്യൽ മീഡിയയിൽ ഒരു പുതിയ താരം ഉദിച്ചുയരുന്നത് മറ്റാരുമല്ല, നമ്മുടെ പൂച്ച സാർ തന്നെ! പാമ്പിനെ കണ്ടാൽ പേടിച്ച് ഓടുന്നവരല്ല, മറിച്ച് തന്റേടത്തോടെ നേരിടുന്ന ഈ പൂച്ചകളുടെ വിഡിയോകളും വാർത്തകളുമാണ് ഇപ്പോൾ ഇൻസ്റ്റഗ്രാമിലും ഫേസ്ബുക്കിലും തരംഗമാകുന്നത്.
ആറ്റിങ്ങലിൽ വീട്ടിൽ കയറാൻ ശ്രമിച്ച എട്ട് അണലികളെയാണ് ഒരു സംഘം പൂച്ചകൾ കടിച്ചുകുടഞ്ഞ് പുറത്തിട്ടത്. ഈ വാർത്ത പുറത്തുവന്നതോടെ “പാമ്പുണ്ടോ പിടിക്കാൻ, പൂച്ച സാർ റെഡി” എന്ന മട്ടിലുള്ള ട്രോളുകളും പോസ്റ്റുകളും നിറയുകയാണ്. വമ്പൻ പാമ്പുകളെപ്പോലും തങ്ങളുടെ കൃത്യമായ പഞ്ച് കൊണ്ടും വേഗത കൊണ്ടും മെരുക്കുന്ന പൂച്ചകളുടെ ‘മാസ്’ എൻട്രി ആരാധകർ ഏറ്റെടുത്തു കഴിഞ്ഞു. കത്തുന്ന ചൂടിൽ പേടിപ്പിക്കുന്ന വാർത്തകൾക്കിടയിൽ ഇത്തരത്തിലുള്ള വാർത്തകൾ അല്പം ആശ്വാസവും ഒപ്പം കൗതുകവുമാണ് നൽകുന്നത്.
പലപ്പോഴും മനുഷ്യർ പാമ്പിനെ കണ്ട് പകച്ചുനിൽക്കുമ്പോൾ, യാതൊരു ഭയവുമില്ലാതെ വീടിന് കാവൽ നിൽക്കുന്ന ഈ പൂച്ചകളെ ‘മിനി ടൈഗർ’ എന്നാണ് സോഷ്യൽ മീഡിയ വിശേഷിപ്പിക്കുന്നത്. പാമ്പ് പിടുത്തക്കാർ വരുന്നതിനു മുൻപേ കാര്യങ്ങൾ സെറ്റിലാക്കുന്ന ഈ വിരുതന്മാരുടെ ചിത്രങ്ങൾ വൈറലായതോടെ, ഇൻസ്റ്റഗ്രാമിലെ റീൽസുകളിലും ഇപ്പോൾ പൂച്ച സാറാണ് താരം. ചുരുക്കത്തിൽ പറഞ്ഞാൽ, ഈ ചൂടുകാലത്ത് പാമ്പുകളെ പേടിക്കുന്നവർക്ക് ഒരു ആശ്വാസമാണ് നമ്മുടെ ഈ രോമക്കുപ്പായക്കാർ
