ന്യൂഡല്ഹി: ചാരവൃത്തിക്കേസില് അറസ്റ്റിലായ യൂട്യൂബര് ജ്യോതി മല്ഹോത്രയോടോപ്പം ലോക്സഭാ പ്രതിപക്ഷ നേതാവ് രാഹുല് ഗാന്ധി നില്ക്കുന്നുവെന്ന തരത്തില് പ്രചരിക്കുന്ന ചിത്രം വ്യാജം. ജ്യോതി മല്ഹോത്രയുടേത് എന്ന പേരില് പ്രചരിക്കുന്നത് രാഹുല് ഗാന്ധിക്കൊപ്പം നില്ക്കുന്ന ഒരു കോണ്ഗ്രസ് പ്രവര്ത്തകയുടെ ചിത്രമാണ്.
റായ്ബറേലിയില് നിന്നുളള കോണ്ഗ്രസ് പ്രവര്ത്തകയായ അതിഥി സിംഗാണ് രാഹുല് ഗാന്ധിക്കൊപ്പം ചിത്രത്തിലുണ്ടായിരുന്നത്. വൈറലാകുന്ന ചിത്രത്തില് ജ്യോതി മല്ഹോത്രയുടെ മുഖം ഫെയ്സ് സ്വാപ്പ് ചെയ്ത് മാറ്റം വരുത്തിയതാണ്. ഈ ചിത്രമാണ് ബിജെപി, സംഘപരിവാര് ഹാന്ഡിലുകള് രാഹുല് ഗാന്ധിക്കൊപ്പം ജ്യോതി മല്ഹോത്ര എന്ന പേരില് പ്രചരിപ്പിക്കുന്നത്.
എക്സില് ചില തീവ്ര വലതുപക്ഷ ഹാന്ഡിലുകളാണ് ചിത്രം വ്യാപകമായി പ്രചരിപ്പിക്കുന്നത്. 2018-ല് അതിഥി സമൂഹമാധ്യമങ്ങളില് പങ്കുവെച്ച ചിത്രമാണിത്. പാകിസ്താനുവേണ്ടി ചാരവൃത്തി നടത്തിയ കേസിലാണ് ഹരിയാന സ്വദേശി ജ്യോതി മല്ഹോത്ര അറസ്റ്റിലായത്.
