തിരുവനന്തപുരം: തദ്ദേശ സ്വയംഭരണ വകുപ്പ് മന്ത്രി കെ.എം. ഷാജിയുടെ ചെക്ക് റിപ്പബ്ലിക് തലസ്ഥാനമായ പ്രാഗിലേക്കുള്ള യാത്രയെച്ചൊല്ലി വിവാദം ശക്തമാകുന്നു. യാത്രയുടെ ഉദ്ദേശ്യത്തെക്കുറിച്ച് ചോദ്യം ഉയർത്തി ഡിവൈഎഫ്ഐ സംസ്ഥാന സെക്രട്ടറി എം. വിജിൻ രംഗത്തെത്തി. കേന്ദ്ര-സംസ്ഥാന സർക്കാരുകളുടെ അനുമതിയില്ലാതെ മദ്യമാഫിയയുടെ സ്പോൺസർഷിപ്പിൽ മന്ത്രി വിദേശയാത്ര നടത്തിയിട്ടുണ്ടോയെന്ന് വ്യക്തമാക്കണമെന്ന് അദ്ദേഹം ആവശ്യപ്പെട്ടു.
മന്ത്രിയുടെ പ്രാഗ് യാത്ര സംബന്ധിച്ച് ലീഗ് ഇതുവരെ പ്രതികരിച്ചിട്ടില്ലെന്നും വിജിൻ കുറ്റപ്പെടുത്തി. അതീവ ഗൗരവമുള്ള വാർത്തയാണ് പുറത്തുവന്നിരിക്കുന്നത്. കേന്ദ്രത്തിന്റെയും സംസ്ഥാന സർക്കാരിന്റെയും അനുമതിയില്ലാതെ ഒരു മന്ത്രിക്ക് ഇത്തരത്തിൽ വിദേശയാത്ര നടത്താനാകുമോയെന്നും അദ്ദേഹം ചോദിച്ചു.
മന്ത്രിയുടെ വകുപ്പിന് കീഴിലുള്ള ഇടമലക്കുടി പഞ്ചായത്തിലെ പ്രശ്നങ്ങളും വിജിൻ ചൂണ്ടിക്കാട്ടി. തദ്ദേശ സ്ഥാപനങ്ങൾക്ക് നൽകേണ്ട ഗ്രാന്റ് പോലും കൃത്യമായി ലഭിക്കുന്നില്ലെന്നും പഞ്ചായത്ത് പ്രതിസന്ധിയിലാണെന്നും അദ്ദേഹം ആരോപിച്ചു. എന്നാൽ സംസ്ഥാനത്തെ തദ്ദേശ സ്ഥാപനങ്ങളുടെ പ്രശ്നങ്ങളിൽ ആശങ്ക പ്രകടിപ്പിക്കാതെ മന്ത്രി പ്രാഗിലെ ടൂറിസം ആഘോഷിക്കുകയാണെന്നും വിജിൻ വിമർശിച്ചു.
യാത്രയെക്കുറിച്ച് മുഖ്യമന്ത്രി വിശദീകരണം നൽകണമെന്നും മന്ത്രിയുടെ വിദേശയാത്രയിൽ കൃത്യമായ അന്വേഷണം വേണമെന്നും വിജിൻ ആവശ്യപ്പെട്ടു. യാത്രയ്ക്ക് പിന്നിൽ മറ്റെന്തെങ്കിലും താൽപര്യങ്ങളോ ദുരുദ്ദേശങ്ങളോ ഉണ്ടായിരുന്നോയെന്നും പരിശോധിക്കണം. യാത്രയുടെ ചെലവ് ആരാണ് വഹിച്ചതെന്നും സ്പോൺസർഷിപ്പ് ഉണ്ടായിരുന്നോയെന്നും വ്യക്തമാക്കണമെന്നും അദ്ദേഹം പറഞ്ഞു.
അതേസമയം, കെ.എം. ഷാജിയുടെ പ്രാഗ് യാത്ര സംബന്ധിച്ച് റിപ്പോർട്ടർ ടി.വി പുറത്തുവിട്ട രേഖകളാണ് വിവാദത്തിന് തുടക്കമിട്ടത്. സെപ്റ്റംബർ 16 മുതൽ 26 വരെ നടത്തിയ യൂറോപ്യൻ യാത്രയിൽ ഓസ്ട്രിയ, ബൾഗേറിയ, സ്വിറ്റ്സർലൻഡ് എന്നീ രാജ്യങ്ങൾ സന്ദർശിക്കാനാണ് മന്ത്രി പൊളിറ്റിക്കൽ ക്ലിയറൻസ് തേടിയതെന്നാണ് റിപ്പോർട്ട്. എന്നാൽ ചെക്ക് റിപ്പബ്ലിക് തലസ്ഥാനമായ പ്രാഗ് ഈ പട്ടികയിൽ ഉൾപ്പെട്ടിരുന്നില്ലെന്നാണ് പുറത്തുവന്ന രേഖകൾ സൂചിപ്പിക്കുന്നത്.
സെപ്റ്റംബർ 20നാണ് മന്ത്രി പ്രാഗിലെത്തിയത്. വിവാദ മദ്യവ്യവസായി ജോൺ സേവ്യറും മന്ത്രിക്കൊപ്പമുണ്ടായിരുന്നുവെന്നാണ് റിപ്പോർട്ട്. യാത്രയുടെ അനുമതി, ചെലവുകൾ, സ്പോൺസർഷിപ്പ് എന്നിവ സംബന്ധിച്ച ചോദ്യങ്ങളാണ് ഇപ്പോൾ ഉയരുന്നത്.
എന്നാൽ താൻ നടത്തിയ യാത്രയ്ക്ക് അനുമതിയുണ്ടെന്നും ആരോപണങ്ങൾ അടിസ്ഥാനരഹിതമാണെന്നുമാണ് കെ.എം. ഷാജിയുടെ പ്രതികരണം. നിയമപരമായ കാര്യങ്ങളിൽ വിശദീകരണം നൽകാമെന്നും ആരോപണങ്ങൾക്ക് ഇപ്പോൾ മറുപടി പറയാനില്ലെന്നും മന്ത്രി വ്യക്തമാക്കിയിരുന്നു.


