ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഡൽഹിയിൽ നടത്തിയ പ്രതിഷേധത്തിനിടെ അഭിഭാഷകരെ കസ്റ്റഡിയിലെടുത്ത പൊലീസ് നടപടിക്കെതിരെ ചീഫ് ജസ്റ്റിസിന് കത്തയച്ച് വിവിധ അഭിഭാഷക സംഘടനകൾ. കസ്റ്റഡിയിലുള്ള അഭിഭാഷകരെ ഉടൻ മോചിപ്പിക്കണമെന്നാണ് കത്തിലെ പ്രധാന ആവശ്യം. സുപ്രീംകോടതി അഡ്വക്കേറ്റ്സ് ഓൺ റെക്കോർഡ് അസോസിയേഷനും സുപ്രീംകോടതി ബാർ അസോസിയേഷനുമാണ് അടിയന്തര ഇടപെടൽ ആവശ്യപ്പെട്ട് ചീഫ് ജസ്റ്റിസിന് കത്തയച്ചത്.
പ്രതിഷേധത്തിനിടെ മുതിർന്ന അഭിഭാഷകർ ഉൾപ്പെടെയുള്ളവരെ പൊലീസ് ബലമായി പിടിച്ചുകൊണ്ടുപോയെന്നാണ് സംഘടനകളുടെ പരാതി. സമാധാനപരമായി പ്രതിഷേധിച്ചവർക്കെതിരെ പൊലീസ് ബലം പ്രയോഗിച്ചെന്നും കത്തിൽ ചൂണ്ടിക്കാട്ടി.
പൊലീസ് നടപടിയെ സംഘടനകൾ ശക്തമായി അപലപിച്ചു. സംഭവത്തിൽ ചീഫ് ജസ്റ്റിസ് അടിയന്തരമായി ഇടപെടണമെന്നും കസ്റ്റഡിയിലുള്ള അഭിഭാഷകരെ മോചിപ്പിക്കാൻ നടപടി സ്വീകരിക്കണമെന്നും സംഘടനകൾ ആവശ്യപ്പെട്ടു.
