കോഴിക്കോട് : മാവൂർ പഞ്ചായത്തിലെ പന്ത്രണ്ടാം വാർഡിൽ മത്സരിക്കാൻ യുഡിഎഫ് സ്ഥാനാർഥിയായി മുനീറത്ത് ടീച്ചർ രംഗത്തിറങ്ങി. കൗതുകകരമായ രാഷ്ട്രീയ മുന്നേറ്റത്തിന്റെ ഭാഗമായി രണ്ട് തവണയും ജനവിശ്വാസം നേടിയ ശേഷം മൂന്നാം തവണയും വിജയപാതയിലെത്താനാണ് അവരുടെ ശ്രമം. ആദ്യമായി ബ്ലോക്ക് പഞ്ചായത്തിൽ വൈസ് പ്രസിഡന്റായും തുടർന്ന് ഗ്രാമ പഞ്ചായത്തിലെ പ്രസിഡന്റായും പ്രവർത്തിച്ച മുനീറത്ത്, ഇപ്പോൾ പുതിയ വാർഡിൽ വീണ്ടും ജനപിന്തുണ തേടുകയാണ്.
വാർഡ് 12 ഏകദേശം എല്ലാ വീടുകളിലും നേരിട്ട് കയറി വോട്ട് അഭ്യർത്ഥിക്കുകയും, വീട്ടിൽ കാണാതിരുന്നവരെ ഫോൺ മുഖേന സമീപിക്കുകയും ചെയ്തിട്ടുണ്ട്. മാവൂർ ഗ്രാമ പഞ്ചായത്തിലെ 1047 വോട്ടർമാരുമായി ഓരോരുത്തരോടും വ്യക്തിപരമായ ബന്ധം സ്ഥാപിച്ചു തീർക്കുകയാണ് അവരുടെ പ്രചാരണ രീതി.
മുമ്പ് ഈ വാർഡിനെ പ്രതിനിധീകരിച്ചത് ലീഗ് നേതാവ് ഉമ്മർമാഷായിരുന്നു. വികസന പ്രവർത്തനങ്ങളിൽ ശ്രദ്ധ കേന്ദ്രീകരിച്ച് ജനപ്രീതി നേടിയ ഉമ്മർമാഷിന്റെ പ്രവർത്തന പൈതൃകവും ഈ പ്രചാരണത്തിന് ശക്തി പകരുന്നുണ്ട്. മന്തലകടവ് വാർഡ് വിഭജനത്തെ തുടർന്ന് മുൻപ് വാർഡ് 15 പെട്ട പ്രദേശങ്ങൾ ഇപ്പോൾ വാർഡ് 12 ലേക്കാണ് വന്നിരിക്കുന്നത്.
കഴിഞ്ഞ വർഷം വാർഡ് നാലിലെ പ്രസിഡന്റായിരുന്ന സമയത്ത് റോഡ് പ്രശ്നങ്ങൾ അടക്കം നിരവധി അടിസ്ഥാന സൗകര്യ വിഷയങ്ങൾ പരിഹരിച്ച മുനീറത്ത് എല്ലാവർക്കും സുപരിചിതയാണ്. മാവൂർ ഒരു സാംസ്കാരിക കേന്ദ്രമാണെന്ന തിരിച്ചറിവോടെ കലാരംഗത്തെ വളർച്ചയ്ക്കായി ഗാന്ധി സ്ക്വയർ പദ്ധതി എത്രയും പെട്ടെന്ന് പൂർത്തിയാക്കുമെന്നും അവർ അറിയിച്ചു.
വാർഡിലെ യുവാക്കളെ കായികരംഗത്തേക്ക് കൂടുതൽ നയിക്കുന്നതിനായി ഒരു കളിസ്ഥലം സാക്ഷാത്കരിക്കാനുള്ള പദ്ധതിയും അവർക്കുണ്ട്. ഓരോ വീട്ടിലും ജൈവ പച്ചക്കറി കൃഷി വ്യാപിപ്പിക്കാനുള്ള പ്രത്യേക പദ്ധതിയും പ്രചാരണ വാഗ്ദാനങ്ങളിൽ ഉൾപ്പെടുത്തി.
മുനീറത്ത് ടീച്ചർ മുസ്ലിം ലീഗിന്റെ പോഷക സംഘടനയുടെ സ്റ്റേറ്റ് ട്രഷററും കലാ ലീഗിന്റെ ജില്ലാ സെക്രട്ടറിയുമാണ്. ശക്തമായ സംഘാടന ശേഷിയും തുടർച്ചയായ ജനസമ്പർക്കവും അവർക്ക് പുതിയ വാർഡിലും ശക്തമായ മുന്നേറ്റം നൽകി വരികയാണ്. വാർഡ് 12 ൽ കോണി ചിഹ്നം പഴയ വിജയകഥ ആവർത്തിക്കുമോ എന്നത് ഇപ്പോൾ മാവൂർ രാഷ്ട്രീയത്തിന്റെ പ്രധാന ചർച്ചയാണ്.
