പത്തനംതിട്ട: റാന്നിയിൽ എക്സൈസ് നടത്തിയ പരിശോധനയിൽ 43 ലിറ്റർ വിദേശമദ്യം പിടികൂടി. സംഭവത്തിൽ കൊല്ലമുള ചാത്തൻതറ സ്വദേശി നസീറിനെ അറസ്റ്റ് ചെയ്തു. പ്രതിയുടെ വീട്ടുപറമ്പിലെ കോഴിക്കൂട്ടിൽ നിന്നാണ് മദ്യം കണ്ടെത്തിയത്. വിൽപനയ്ക്കായി സൂക്ഷിച്ചിരുന്ന 86 കുപ്പി വിദേശമദ്യമാണ് എക്സൈസ് പിടിച്ചെടുത്തത്. ഓർഡർ ലഭിക്കുന്നതിനനുസരിച്ച് ഓട്ടോറിക്ഷയിൽ മദ്യം എത്തിച്ചുനൽകുകയായിരുന്നു പ്രതിയുടെ രീതിയെന്ന് എക്സൈസ് അറിയിച്ചു. ഒരു ആഴ്ചക്കാലം നീണ്ട രഹസ്യനിരീക്ഷണത്തിനൊടുവിലാണ് എക്സൈസ് ഷാഡോ സംഘം പ്രതിയെ പിടികൂടിയത്. സംഭവത്തിൽ കൂടുതൽ അന്വേഷണം തുടരുകയാണെന്ന് അധികൃതർ അറിയിച്ചു.