ബെയ്‌റൂട്ട്: ഡൊണാൾഡ് ട്രംപ് ലെബനൻ വിഷയത്തിൽ ഇസ്രായേലിനെതിരെ വിമർശനം ഉന്നയിച്ചതിന് പിന്നാലെ തെക്കൻ ലെബനനിൽ വീണ്ടും ഇസ്രായേൽ വ്യോമാക്രമണം. മൻസൂരി, ആസിയേ, ബരാഷിത് എന്നിവിടങ്ങളിലാണ് ആക്രമണം റിപ്പോർട്ട് ചെയ്തത്. നബാതിയ അൽ-ഫൗഖ പ്രദേശത്തും ക്ഫാർ ടെബ്‌നിറ്റിന്റെ അതിർത്തി പ്രദേശങ്ങളിലുമാണ് ഇസ്രായേൽ യുദ്ധവിമാനങ്ങൾ ബോംബിട്ടതെന്ന് ലെബനൻ ഔദ്യോഗിക വാർത്താ ഏജൻസി എൻ.എൻ.എ അറിയിച്ചു. ആക്രമണങ്ങളിൽ നിരവധി പേർക്ക് പരിക്കേറ്റതായി റിപ്പോർട്ടുണ്ട്. ഹിസ്ബുള്ളയെ ലക്ഷ്യമിട്ടാണ് ആക്രമണമെന്നാണ് മുൻപ് ഇസ്രായേൽ വ്യക്തമാക്കിയിരുന്നത്. എന്നാൽ പുതിയ ആക്രമണങ്ങളെക്കുറിച്ച് ഇസ്രായേൽ പ്രതിരോധ സേന പ്രതികരിച്ചിട്ടില്ല. […]