കല്പറ്റ: മാനന്തവാടിയില് ആദിവാസിയെ അരക്കിലോമീറ്ററോളം റോഡിലൂടെ വലിച്ചിഴച്ച് കൊണ്ടുപോയ സംഭവത്തില് ആര്സി ഉടമയെ തിരിച്ചറിഞ്ഞു. കുറ്റിപ്പുറം സ്വദേശി മുഹമ്മദ് റിയാസാണ് വാഹനത്തിന്റെ ആര് സി ഉടമയെന്നാണ് രേഖകളില് നിന്നും ലഭിച്ചത്. എന്നാല് സംഭവം നടക്കുമ്പോള് വാഹനം ഓടിച്ചിരുന്നത് റിയാസ് ആണോ എന്നതില് വ്യക്തതയില്ല. അഞ്ച് പേരാണ് വാഹനത്തില് ഉണ്ടായിരുന്നതെന്ന് ദൃക്സാക്ഷികള് പറയുന്നു. മൂന്നുപേര് പിറകിലും രണ്ട് പേര് മുന്സീറ്റിലുമായിരുന്നുവെന്നാണ് വിവരം.
മാനന്തവാടിയില് വിനോദസഞ്ചാരത്തിനെത്തിയവര് തമ്മിലുണ്ടായ തര്ക്കത്തില് ഇടപെട്ടതിനെ തുടര്ന്നാണ് കൂടല്കടവ് ചെമ്മാട് നഗറിലെ മാതനെ അരകിലോമീറ്ററോളം റോഡിലൂടെ വലിച്ചിഴച്ചത്. ഗുരുതരമായി പരിക്കേറ്റ മാതന് മാനന്തവാടി ആശുപത്രിയില് ചികിത്സയിലാണ്. കൈയ്ക്കും കാലിനും പുറത്തും സാരമായി പരിക്കേറ്റെന്ന് മാതന് പറഞ്ഞു.
