കർണാടക: ഓൺലൈൻ ഗെയിം കളിക്കാൻ അമ്മ മൊബൈൽ ഫോൺ നൽകാത്തതിനെ തുടർന്ന് 14കാരൻ ആത്മഹത്യ ചെയ്തു. കർണാടകയിലെ ഹുബ്ബള്ളി ഉദയനഗറിലാണ് ദാരുണ സംഭവം. സമർഥ് (14) ആണ് മരിച്ചത്. കുട്ടി ‘ഫ്രീ ഫയർ’ ഗെയിമിനോട് അതിയായ ആശക്തിയുണ്ടായിരുന്നുവെന്ന് പൊലീസ് അറിയിച്ചു.

മൊബൈൽ ഉപയോഗം കുറയ്ക്കാനും ഗെയിം കളി നിർത്താനുമായി വീട്ടുകാർ പല തവണ മുന്നറിയിപ്പ് നൽകിയിരുന്നു. കഴിഞ്ഞ ദിവസം രാത്രിയും അമ്മ ഗെയിം കളിക്കരുതെന്ന് നിർദേശിച്ചതിനെ തുടർന്ന് വിഷമിച്ച സമർഥ് മുറിയിൽ കയറി അമ്മയുടെ സാരിയിൽ തൂങ്ങി മരിക്കുകയായിരുന്നു.

സംഭവത്തിൽ ഹുബ്ബള്ളി കേശ്വാപുർ പൊലീസ് സ്റ്റേഷനിൽ കേസ് രജിസ്റ്റർ ചെയ്തു. മൃതദേഹം പോസ്റ്റ്‌മോർട്ടത്തിനായി കിംസ് ആശുപത്രിയിലേക്ക് മാറ്റി. ഹുബ്ബള്ളി പൊലീസ് കമ്മീഷണർ എൻ. ശശികുമാർ ആശുപത്രി സന്ദർശിച്ച് സ്ഥിതിഗതികൾ വിലയിരുത്തി.