കോട്ടയം : ക്രിസ്മസിനെ വരവേൽക്കാൻ കടുത്തുരുത്തി യൂണിറ്റ് ക്‌നാനായ കാത്തലിക് യൂത്ത് ലീഗിന്റെ യുവജനങ്ങൾ ഒരുക്കിയ 32 അടി നീളമുള്ള ക്രിസ്മസ് സ്റ്റാർ പള്ളിമുറ്റത്ത് ഉയർന്നു. ഇടവക ജനങ്ങൾക്ക് വ്യത്യസ്തമായ കാഴ്ചാനുഭവമാണ് ഈ വർഷത്തെ നക്ഷത്രം സമ്മാനിച്ചത്.

യൂണിറ്റിലെ 35-ഓളം വരുന്ന യുവജനങ്ങൾ നാല് ദിവസത്തെ കൂട്ടായ പ്രയത്നത്തിലൂടെയാണ് ഈ വിസ്മയ നക്ഷത്രം സജ്ജമാക്കിയത്. ഏറ്റവും ശ്രദ്ധേയമായത്, നക്ഷത്രത്തിന്റെ തുണിയിൽ എല്ലാവരുടെയും കൈപ്പത്തിയുടെ പ്രിൻ്റുകൾ പെയിന്റിൽ മുക്കി പതിപ്പിച്ച നൂതന ശൈലിയാണ്. ഇത് നക്ഷത്രത്തിന് പ്രത്യേക ഭംഗിയും കൂട്ടായ്മയുടെ സന്ദേശവും നൽകി.

വികാരി ഫാദർ ജോൺസൺ നീലനിരപ്പേൽ അച്ചൻ്റെയും, കെ.സി.വൈ.എൽ. യൂണിറ്റ് പ്രസിഡൻ്റ് ഗാസ്പർ തോമസ് സജി കളത്തീക്കോട്ടിൽ, സെക്രട്ടറി ജോയേൽ റജി കരോട്ട് പുത്തൻപുരയിൽ എന്നിവരുടെയും നേതൃത്വത്തിലാണ് ഈ ക്രിസ്മസ് വിസ്മയം പള്ളിമുറ്റത്ത് സ്ഥാപിച്ചത്. യുവജനങ്ങളുടെ ഈ ക്രിയാത്മക സംരംഭം ഇടവകയിലെ മറ്റ് കൂട്ടായ്മകൾക്കും പ്രചോദനമായി.