തിരുവനന്തപുരം: സർക്കാർ ജീവനക്കാരുടെയും അധ്യാപകരുടെയും എയ്ഡഡ് വിദ്യാഭ്യാസ സ്ഥാപനങ്ങളിലെ ജീവനക്കാരുടെയും തദ്ദേശ സ്ഥാപനങ്ങളിലെ താൽക്കാലിക ജീവനക്കാരുടെയും ശമ്പളത്തിൽ 4 ശതമാനം ക്ഷാമബത്ത (ഡി.എ.) കൂട്ടിച്ചേർത്ത് വിതരണം ഇന്ന് മുതൽ ആരംഭിച്ചു. ഒക്ടോബർ മാസത്തെ ശമ്പളത്തോടൊപ്പം പുതുക്കിയ ഡി.എ. നൽകുന്നതാണ്. വിരമിച്ച ജീവനക്കാരുടെ പെൻഷനും പുതുക്കിയ നിരക്കിൽ ലഭ്യമാക്കുന്നു.
തസ്തികാനുസൃതമായ ശമ്പള വർധന ഇങ്ങനെ, ക്ലർക്ക് തസ്തികയിലുള്ളവർക്ക് 1060 രൂപ കൂടും. എൽപിഎസ്എ- 1424 രൂപ, എച്ച്എസ്എ- 1652 രൂപ, പൊലീസ് കോൺസ്റ്റബിൾ-1244 രൂപ, അസി. എൻജിനിയർ-2208 രൂപ, സെക്രട്ടറിയറ്റ് അസിസ്റ്റന്റ്- 1572 രൂപ, നഴ്സിങ് ഓഫീസർ 1572 രൂപ എന്നിങ്ങനെയാണ് വർധിക്കുക.
2023 ജനുവരി 1 മുതൽ കുടിശ്ശികയായി നിലനിന്ന 4 ശതമാനം ഡി.എ.യാണ് ഇപ്പോൾ നൽകിയിരിക്കുന്നത്. ഈ ഗഡുവിന്റെ 34 മാസത്തെ കുടിശ്ശികയും ഇനിയും വിതരണം ചെയ്യേണ്ടതുണ്ട്. കൂടാതെ, 2023 ജൂലൈ 1 മുതൽ 3%, 3%, 3%, 2%, 2% എന്നിങ്ങനെ ആകെ 13 ശതമാനം ഡി.എ.യുടെ അഞ്ചുഗഡുക്കൾ കൂടി അനുവദിക്കാനുണ്ടെന്ന് സർക്കാർ സൂചിപ്പിച്ചു. നിലവിലെ സർക്കാരിന്റെ കാലയളവിൽ അനുവദിച്ച 5 ഗഡുക്കളിലെ 191 മാസത്തെ കുടിശ്ശികയും തീർപ്പാക്കാനുള്ളതായും അധികൃതർ അറിയിച്ചു.
