ആലപ്പുഴ: കായംകുളത്ത് സ്വകാര്യ ആശുപത്രിയില് ചികിത്സയിലിരുന്ന ഒന്പത് വയസുകാരി മരിച്ചു. പനിയും വയറു വേദനയുമായി ആശുപത്രിയില് പ്രവേശിപ്പിച്ച ചേരാവള്ളി ചിറക്കടവം സ്വദേശികളായ അജിത്തിന്റെയും ശരണ്യയുടെയും മകള് ആദി ലക്ഷ്മി (9) ആണ് ശനിയാഴ്ച രാവിലെ മരിച്ചത്.
ഇന്ന് രാവിലെ കുത്തിവയ്പ്പെടുത്ത ശേഷം ഉറങ്ങിയ കുട്ടി ഉണരാതിരുന്നതോടെ നടത്തിയ പരിശോധനയിലാണ് മരണം സ്ഥിരീകരിച്ചത്. ആശുപത്രിയിൽ ചികിത്സാപ്പിഴവ് ആരോപിച്ച് കുടുംബം. തുടർന്ന് കുട്ടിയുടെ ബന്ധുക്കള് എബ്നൈസര് ആശുപത്രിയില് പ്രതിഷേധിച്ചു. ആശുപത്രി അധികൃതരും ബന്ധുക്കളും തമ്മിലുണ്ടായ വാക്കേറ്റത്തിൽ ആശുപത്രിയുടെ ജനല് ചില്ലുകള് തല്ലിത്തകര്ക്കുന്നതില് കലാശിച്ചു.
വ്യാഴാഴ്ചയാണ് ആദി ലക്ഷ്മിയെ സ്വകാര്യ ആശുപത്രിയില് പ്രവേശിപ്പിച്ചത്. സ്കാനിങ് ഉള്പ്പെടെയുള്ള പരിശോധനകള് നടത്തി കുട്ടിക്കു കുഴപ്പങ്ങള് ഒന്നുമില്ലെന്നാണ് ആശുപത്രി അധികൃതര് അറിയിച്ചിരുന്നതെന്ന് ബന്ധുക്കള് പറയുന്നു. പിന്നാലെയാണ് ഇന്ന് രാവിലെ കുട്ടിയ്ക്ക് കുത്തിവയ്പ്പെടുത്തത്.
എന്നാല് ചികിത്സാ പിഴവ് ഉണ്ടായിട്ടില്ലെന്നും ഹൃദയസ്തംഭനമാണ് മരണ കാരണമെന്നും ആശുപത്രി അധികൃതര് അറിയിച്ചു. ആദി ലക്ഷ്മിയുടെ മൃതദേഹം പോസ്റ്റ്മോര്ട്ടത്തിനായി വണ്ടാനം മെഡിക്കല് കോളേജ് ആശുപത്രിയിലേക്ക് മാറ്റി. ഗവ. എല്പി സ്കൂളിലെ മൂന്നാം ക്ലാസ് വിദ്യാര്ഥിയായിരുന്നു ആദി ലക്ഷ്മി.
