ലോകത്തിലാകമാനം ഏകദേശം 85 മുതല് 90 ശതമാനം വരെ ആളുകള് വലംകൈയ്യന്മാരാണ്. 10 മുതല് 15 ശതമാനം വരെ ആളുകള് മാത്രമേ ഇടംകൈയ്യന്മാരുള്ളൂ. എന്തുകൊണ്ടായിരിക്കും ഇങ്ങനെ? സ്ഥലങ്ങള്ക്കനുസരിച്ച് കണക്കുകളില് വ്യത്യാസം വരാമെങ്കിലും വലതുകൈയ്യേക്കാള് ഇടംകൈയ്യന്മാര് കൂടുതലായി കാണപ്പെടുന്ന ഒരു മനുഷ്യ ജനസംഖ്യയും നിലവിലില്ലെന്ന്, യുകെയിലെ ചെസ്റ്റര് സര്വകലാശാലയിലെ മനഃശാസ്ത്രത്തിലെ സീനിയര് ലക്ചറായ പോള് റോഡ്വേ പറയുന്നു. മനുഷ്യര് വലതുകൈ ഇത്രയധികം ഉപയോഗിക്കുന്നത് എന്തുകൊണ്ടാണെന്ന് മനസിലാക്കാന് ശാസ്ത്രജ്ഞര് വളരെക്കാലമായി ശ്രമിക്കുകയാണ്.
ജനിച്ച് വളരുന്ന പരിസ്ഥിതിയും സമൂഹവും സംസ്കാരവും ഇതില് പ്രധാന പങ്ക് വഹിക്കുന്നുണ്ട്. മിക്ക ഏഷ്യന്, ആഫ്രിക്കന് രാജ്യങ്ങളിലും ഇടതുകൈ ‘വൃത്തിഹീന’മായി കണക്കാക്കപ്പെടുന്നു, കൂടാതെ ഇടതുകൈ കൂടുതലുള്ള കുട്ടികളെ നിയന്ത്രണത്തിലൂടെയും ശിക്ഷയിലൂടെയും വലംകൈയ്യന്മാരാക്കാന് നിര്ബന്ധിതരാക്കുന്നു .
ഒരു കൈയ്ക്ക് മറ്റേ കൈയേക്കാള് കൂടുതല് മുന്ഗണന നല്കുന്നതിനെ വിളിക്കുന്ന സാങ്കേതിക പദമാണ് ‘മാനുവല് ലാറ്ററലൈസേഷന്’ (manual lateralization). ഇത് മനുഷ്യരില് മാത്രം കാണപ്പെടുന്ന ഒന്നല്ല. പല കശേരുകികളും (vertebrates), കൂടാതെ ചില അകശേരുകികളും (invertebrates) വരെ ഇത്തരത്തില് പ്രത്യേക കൈയോ കാലോ ഉപയോഗിക്കുന്നതില് വ്യക്തിപരമായ മുന്ഗണന കാണിക്കാറുണ്ട്. മറ്റു ജീവികളില് നിന്ന് മനുഷ്യരെ വ്യത്യസ്തരാക്കുന്നത് അനുപാതത്തിലുള്ള കനത്ത വ്യത്യാസമാണ്.
ഇന്നുവരെ പഠനവിധേയമാക്കിയിട്ടുള്ള ഏതാണ്ടെല്ലാ മനുഷ്യസമൂഹങ്ങളിലും, ഏകദേശം 90ശതമാനം ആളുകളും വലങ്കൈ ശീലമുള്ളവരാണ്. ഈ വലംകൈ ശീലം എപ്പോഴാണ് ആരംഭിച്ചതെന്നതിന്റെ ആദ്യകാല സൂചനകള് നമുക്ക് നല്കുന്നത് ഫോസില് രേഖകളാണ്. 26 ലക്ഷം വര്ഷം പഴക്കമുള്ള, ഏറ്റവും പഴയ ആയുധശേഖരമായ ഒല്ഡോവന് (Oldowan) ശിലാ ആയുധങ്ങള് നിര്മ്മിച്ചവര് ഭൂരിഭാഗവും വലങ്കൈയ്യന്മാര് അയിരുന്നുവേ്രത. ഹോമോ സാപിയന്സ് നിലവില് വരുന്നതിനും മുന്പ്, ഹോമോ ഇറക്റ്റസ് പൂര്ണമായി വളര്ച്ച പ്രാപിക്കുന്നതിനും മുമ്പുള്ളവരിലും ഇതേ ശീലമുണ്ടായിരുന്നുവത്രേ.
നിയാണ്ടര്ത്താലുകളെക്കുറിച്ചുള്ള തെളിവുകള് പരിശോധിച്ചതില് അവര് എന്തെങ്കിലും വസ്തു വായില് കടിച്ചുപിടിച്ചുകൊണ്ട് ശിലാ ആയുധങ്ങള് ഉപയോഗിച്ചപ്പോള് അവരുടെ മുന്പല്ലുകളില് ഉണ്ടായ പോറലുകള് പരിശോധിച്ചപ്പോള്, അവയെല്ലാം ഇടത്തുനിന്ന് വലത്തോട്ടുളള ദിശയിലാണ് കാണപ്പെടുന്നത്. അതായത് ഒരു വലങ്കൈയ്യന്റെ രീതി.
സൂക്ഷ്മമായ ജോലികള് ചെയ്യുന്നത് രണ്ട് കൈകളും ഒരേപോലെയല്ല ഉപയോഗിക്കുന്നത്. കൂടുതല് പ്രാപ്തിയുള്ള കൈ സൂക്ഷ്മമായ ജോലികള് ചെയ്യുമ്പോള്, മറ്റേ കൈ അതിനെ താങ്ങിനിര്ത്താന് സഹായിക്കുന്നു. തലച്ചോറിലെ ഞരമ്പുകളുടെ ഘടന, ഈ ജോലി വിഭജനം കൂടുതല് വേഗതയേറിയതും വിശ്വസനീയവുമാക്കിയ വ്യക്തികളെ പ്രകൃതിനിര്ദ്ധാരണംതുണച്ചിട്ടുണ്ടാകാം.
മനുഷ്യരില്, ഭാഷ കൈകാര്യം ചെയ്യുന്നത് ഭൂരിഭാഗവും തലച്ചോറിന്റെ ഇടതുഭാഗത്താണ്. ഈ ഭാഗമാണ് ശരീരത്തിന്റെ വലതുവശത്തെ നിയന്ത്രിക്കുന്നത്. സംസാരവും ആംഗ്യങ്ങളും പരസ്പരം പിണഞ്ഞുകിടക്കുന്ന സംവിധാനങ്ങളായി ഉയര്ന്നുവന്നത്, ഇടതുപക്ഷ മസ്തിഷ്ക മേധാവിത്വവും വലംകൈ മുന്ഗണനയും ഈ ബന്ധം കാണിക്കുന്നതാണ്.
സങ്കീര്ണ്ണവും ക്രമബദ്ധവുമായി ചെയ്യേണ്ടതുമായ പെരുമാറ്റങ്ങള്ക്ക് (ഉദാഹരണത്തിന്: ഭക്ഷണം പാകം ചെയ്യുക, ഒരു അഭയകേന്ദ്രം നിര്മ്മിക്കുക, ആചാരം അനുഷ്ഠിക്കുക തുടങ്ങിയവ) തലച്ചോറിന്റെ ഭാഗത്തുനിന്നുള്ള ഒരുതരം ‘പ്രോജക്റ്റ് മാനേജ്മെന്റ്’ ആവശ്യമാണ് എന്ന ആശയമാണിത്. ഇത്തരം ശ്രേണിബദ്ധമായി ആസൂത്രണം ചെയ്യേണ്ട കാര്യങ്ങള്ക്ക് തലച്ചോറിന്റെ ഇടതുഭാഗമാണ് കൂടുതല് അനുയോജ്യമെന്ന് വിശ്വസിക്കാന് കാരണങ്ങളുണ്ട്.
മറ്റുള്ളവരെ അനുകരിക്കുന്ന സ്വഭാവം മനുഷ്യരിലുണ്ട്. മുതിര്ന്നവര് നമുക്ക് എന്തെങ്കിലും ഒരു കാര്യം കാണിച്ചുതരുമ്പോള്, പഠിക്കുന്ന ആളും പഠിപ്പിക്കുന്ന ആളും ഒരേ കൈ തന്നെയാണ് പ്രധാനമായി ഉപയോഗിക്കുന്നതെങ്കില് അത് കണ്ടുപഠിക്കാന് കൂടുതല് എളുപ്പമാണ്. ഇതിനകം തന്നെ വലംകൈ ശീലത്തിന് മുന്ഗണനയുള്ള ഒരു ജനസമൂഹത്തില്, ഭൂരിപക്ഷത്തോട് പൊരുത്തപ്പെട്ടുപോകുന്നതിലൂടെ ലഭിക്കുന്ന സാമൂഹിക നേട്ടങ്ങള് തലമുറകളിലൂടെ ഈ ശീലത്തെ കൂടുതല് ശക്തമാക്കിയിട്ടുണ്ടാകാം.
