കേരള ഭാഗ്യക്കുറിയുടെ ഒന്നാം സമ്മാനം ഒരുകോടി രൂപയും ടിക്കറ്റ് വില 50 രൂപയുമാക്കി പരിഷ്കരിച്ച ആദ്യ ടിക്കറ്റ് വെള്ളിയാഴ്ച വിപണിയിലെത്തും. ‘സുവര്ണ കേരളം’ എന്ന പേരിലാണ് ടിക്കറ്റ്. ടിക്കറ്റുകള് ബുധനാഴ്ച അതത് ലോട്ടറി കാര്യാലയങ്ങളിലെത്തി. വെള്ളിയാഴ്ച രാവിലെ വിതരണം ആരംഭിക്കും.
ഇതാദ്യമായാണ് ചെറുകിട ഏജന്റുമാര്ക്കായി ഏഴുലക്ഷം ടിക്കറ്റുകള് മാറ്റിവെച്ചിരിക്കുന്നത്. ശാരീരികവെല്ലുവിളി നേരിടുന്നവരും നടന്ന് വില്പന ചെയ്യുന്നവര്ക്കും ഉള്പ്പെടെ കൂടുതല്പ്പേര്ക്ക് അടുത്തകാലത്തായി ഏജന്സി നല്കിയിട്ടുണ്ട്.
അതോടൊപ്പം വൻകിട ഏജന്റുമാര്ക്ക് നല്കുന്ന എണ്ണത്തില് നേരിയ കുറവും വരുത്തി. നിലവില് 1.08 കോടി ടിക്കറ്റുകളാണ് വില്ക്കുന്നത്. വില 50 രൂപയാക്കി ഉയർത്തിയതിനാൽ 96 ലക്ഷം ടിക്കറ്റേ അടിക്കൂ. തികയാതെ വന്നാല് എണ്ണം കൂട്ടും. വെള്ളിയാഴ്ചത്തെ ‘നിര്മല്’ ടിക്കറ്റിന് പകരമായെത്തുന്ന ‘സുവര്ണ കേരള’ത്തിന് രണ്ടാം സമ്മാനം 30 ലക്ഷം രൂപയാണ്.
