ഇസ്ലാമാബാദ്: ഇന്ത്യയ്ക്ക് കടുത്ത മുന്നറിയിപ്പ് നല്കി പാക് മുന് വിദേശകാര്യമന്ത്രി ബിലാവല് ഭൂട്ടോ സര്ദാരി. സിന്ധു നദീജല കരാര് റദ്ദാക്കിയതിനുപിന്നാലെയാണ് ഭീഷണിയുമായി എത്തിയിരിക്കുന്നത്. ഒന്നുകില് നമ്മുടെ വെളളം അതിലൂടെ ഒഴുകും അല്ലെങ്കില് അവരുടെ രക്തം ഒഴുകും എന്നാണ് ബിലാവല് ഭൂട്ടോ പാകിസ്താനില് നടന്ന ഒരു പൊതുറാലിയില് പറഞ്ഞത്.
പഹല്ഗാമില് നടന്ന ഭീകരാക്രമണത്തില് ഇന്ത്യ പാകിസ്താനെ ബലിയാടാക്കുകയാണെന്നും അവരുടെ ആഭ്യന്തര സുരക്ഷാവീഴ്ച്ചകളില് നിന്ന് ശ്രദ്ധ തിരിക്കാനാണ് ശ്രമമെന്നും അദ്ദേഹം ആരോപിച്ചു. സിന്ധു നദി പാകിസ്താന്റേതാണെന്നും അത് പാകിസ്താന്റേതായി തന്നെ തുടരുമെന്നും ഇന്ത്യയോട് പറയാന് ആഗ്രഹിക്കുന്നുവെന്നും ഭൂട്ടോ പറഞ്ഞു. പാക് പ്രതിരോധ മന്ത്രി ഖവാജ ആസിഫും ഇന്ത്യയ്ക്കെതിരെ ആണവായുധ ഭീഷണി മുഴക്കിയിരുന്നു.
