ന്യൂഡല്ഹി: പഹല്ഗാം ഭീകരാക്രമണത്തില് പ്രധാനമന്ത്രി നരേന്ദ്ര മോദിക്കെതിരെ ആരോപണവുമായി കോണ്ഗ്രസ് അധ്യക്ഷന് മല്ലികാര്ജുന ഖാര്ഗെ. ജമ്മു കശ്മീരിലെ പഹല്ഗാമിൽ ഭീകരാക്രമണമുണ്ടാകുമെന്ന ഇന്റലിജന്സ് റിപ്പോര്ട്ട് ആക്രമണം നടക്കുന്നതിന് മൂന്ന് ദിവസം മുമ്പ് തന്നെ പ്രധാനമന്ത്രിക്ക് ലഭിച്ചിരുന്നുവെന്നാണ് ഖാര്ഗെ ആരോപിക്കുന്നത്.
ഇന്റലിജന്സ് റിപ്പോര്ട്ടിന്റെ അടിസ്ഥാനത്തിലാണ് മോദിയുടെ ജമ്മു കശ്മീര് സന്ദര്ശനം മാറ്റിവെച്ചതെന്നും ഖാര്ഗെ ആരോപിക്കുന്നു. പഹല്ഗാമില് ഭീകരാക്രമണമുണ്ടാകാന് കാരണം ഇന്റലിജന്സ് വീഴ്ചയാണ്. സർക്കാർ അത് അംഗീകരിക്കണം. ആക്രമണം ഉണ്ടാകുമെന്ന് അറിഞ്ഞിരുന്നെങ്കിൽ എന്തുകൊണ്ടാണ് നടപടികൾ ഉണ്ടാകാതെ പോയതെന്നും ഖാര്ഗെ ചോദിക്കുന്നു.
ആക്രമണത്തിന് മൂന്ന് ദിവസം മുമ്പ് തന്നെ ഇതുസംബന്ധിച്ച ഇന്റലിജന്സ് റിപ്പോര്ട്ട് പ്രധാനമന്ത്രിക്ക് ലഭിച്ചുവെന്നാണ് തനിക്ക് കിട്ടിയ വിവരമെന്നും ഇന്റലിജന്സ് റിപ്പോര്ട്ടുള്ളതുകൊണ്ടാണ് പ്രധാമന്ത്രിയുടെ കശ്മീര് സന്ദര്ശനം റദ്ദാക്കിയതെന്നും ഖാര്ഗെ ആരോപിച്ചു. മാത്രമല്ല, താനിത് പത്രങ്ങളില് വായിച്ചിരുന്നുവെന്നും അദ്ദേഹം പറഞ്ഞു. ഏപ്രില് 22-ന് നടന്ന ആക്രമണത്തില് 26 പേരാണ് കൊല്ലപ്പെട്ടത്. തുടര്ന്ന് നടന്ന സര്വകക്ഷിയോഗത്തില് സുരക്ഷാവീഴ്ച ഉണ്ടായെന്ന് സര്ക്കാര് സമ്മതിച്ചിരുന്നു.
