കൊച്ചി: കേരളത്തിലെ മദ്യ വില്പനയിൽ പുതിയ റെക്കോര്ഡുകള് സൃഷ്ടിക്കുമ്പോഴും ബിയര് ഉപയോഗത്തില് കുറവെന്ന് റിപ്പോര്ട്ട്. 2023-25 കാലയളവില്, സംസ്ഥാനത്തെ ബിയര് വില്പന കുത്തനെ കുറഞ്ഞു. രണ്ട് വര്ഷത്തിനിടെ വില്പനയില് ഏകദേശം പത്ത് ലക്ഷം കെയ്സുകളുടെ കുറവ് നേരിട്ടു. ബിയര് ഉപഭോഗത്തില് 8.6 ശതമാനം കുറവാണ് ഉണ്ടായിരിക്കുന്നത് എന്നാണ് റിപ്പോര്ട്ടുകള്.
സംസ്ഥാനത്ത് റെക്കോര്ഡ് ചൂട് രേഖപ്പെടുത്തിയ കാലത്തും ബിയര് ഉപഭോഗത്തില് വന്ന കുറവ് വിപണിയില് മദ്യത്തോടുള്ള താത്പര്യം വര്ധിച്ചതിന്റെ സൂചനയാണ് എന്നാണ് അധികൃതര് ചൂണ്ടിക്കാട്ടുന്നത്. കഴിഞ്ഞ രണ്ട് വര്ഷമായി ബിയര് ഉപഭോഗം കുറഞ്ഞതായി ബെവ്കോ മാനേജിംഗ് ഡയറക്ടര് ഹര്ഷിത അട്ടലൂരിയും വ്യക്തമാക്കുന്നു. ബിവറേജസ് കോര്പ്പറേഷന്റെ കണക്കുകള് പ്രകാരം ബാറുകള്, ബെവ്കോ ഔട്ട്ലെറ്റുകള് എന്നിവയില് നിന്ന് ഉള്പ്പെടെ ബിയര് വില്പന 2022-23 സാമ്പത്തിക വര്ഷത്തില് 112 ലക്ഷം കേയ്സുകളായിരുന്നു. 2024-25 കാലത്ത് ഇത് 102.39 ലക്ഷം കേയ്സുകളായി കുറഞ്ഞു.
സംസ്ഥാത്തെ ബിയര് വില്പനയില് വന്ന കുറവിന് കാരണം സര്ക്കാര് വില്പന സംവിധാനങ്ങളില് ഉള്പ്പെടെയുള്ള അടിസ്ഥാന സൗകര്യങ്ങളുടെ കുറവാണെന്നാണ് വിദഗ്ധരുടെ അഭിപ്രായം. സര്ക്കാര് ഉടമസ്ഥതയിലുള്ള വില്പന ശാലകളിലും ബിയര് ഉത്പന്നങ്ങള് തണുപ്പിക്കാൻ ഉൾപ്പടെയുള്ള ഉപകരണങ്ങളുടെ കുറവ് വില്പനയെ ബാധിച്ചിട്ടുണ്ടെന്ന് ബ്രൂവേഴ്സ് അസോസിയേഷന് ഓഫ് ഇന്ത്യയുടെ ഡയറക്ടര് ജനറല് വിനോദ് ഗിരിപറഞ്ഞു. ബിയര് വില്പന പ്രോത്സാഹിപ്പിക്കാന് മദ്യ നയത്തില് മാറ്റം വരുത്തണം, അതിനായി മോഡല് ഷോപ്പുകള് തുറക്കുക, ബിയര് കമ്പനികള്ക്ക് ചില്ലറ വില്പന കേന്ദ്രങ്ങള് അനുവദിക്കുക, ഡ്രാഫ്റ്റ് ബിയര് വില്പ്പന അനുവദിക്കുക.
