കൊച്ചി: ചിക്കൻപോക്സ് വ്യാപനത്തെ തുടർന്ന് കൊച്ചിയിലെ കൊച്ചിൻ യൂണിവേഴ്സിറ്റി ഓഫ് സയൻസ് ആൻഡ് ടെക്നോളജി (കുസാറ്റ്) ക്യാമ്പസ് അടച്ചു. ക്യാമ്പസിലെ ക്ലാസുകൾ പൂർണമായും ഓൺലൈനിലേക്ക് മാറ്റി. ഹോസ്റ്റലുകളും അടച്ചതായി അധികൃതർ അറിയിച്ചു.
രോഗവ്യാപനത്തെ തുടർന്ന് കുസാറ്റ് യൂണിയൻ തെരഞ്ഞെടുപ്പും മാറ്റിവെച്ചു. പുതുക്കിയ തെരഞ്ഞെടുപ്പ് തീയതി പിന്നീട് അറിയിക്കുമെന്ന് അധികൃതർ വ്യക്തമാക്കി.
കഴിഞ്ഞ കുറച്ച് ദിവസങ്ങളായി ക്യാമ്പസിലെ നിരവധി വിദ്യാർഥികൾക്ക് പനിയും ദേഹാസ്വാസ്ഥ്യവും അനുഭവപ്പെട്ടിരുന്നു. ഇതിന്റെ പശ്ചാത്തലത്തിൽ ക്യാമ്പസിൽ ജാഗ്രതാ നിർദേശം നൽകിയിരുന്നു. ഇതിനിടെ രണ്ട് വിദ്യാർഥികൾക്ക് ചിക്കൻപോക്സ് സ്ഥിരീകരിച്ചു.
തുടർന്ന് സ്കൂൾ ഓഫ് എൻജിനീയറിങ്ങിലെ വിദ്യാർഥികളുടെ ക്ലാസുകൾ ഓൺലൈനിലേക്ക് മാറ്റിയിരുന്നു. രോഗവ്യാപനം കൂടുതൽ വിദ്യാർഥികളിലേക്ക് പടർന്നതോടെയാണ് മുൻകരുതൽ നടപടിയുടെ ഭാഗമായി കുസാറ്റ് ക്യാമ്പസ് അടച്ചത്.
