ഇടുക്കി: കല്ലാര്കുട്ടി ഡാം തുറക്കാന് അനുമതി. ഡാമിന്റെ വൃഷ്ടിപ്രദേശത്ത് മഴ തുടരുന്ന സാഹചര്യത്തിലാണ് ജില്ലാ ഭരണകൂടത്തിന്റെ നടപടി. നിയന്ത്രിത അളവില് ഷട്ടറുകള് തുറന്ന് വെള്ളം പുറത്തേക്ക് ഒഴുക്കും.
മുതിരപ്പുഴയാറിന്റെയും പെരിയാറിന്റെയും തീരപ്രദേശങ്ങളിലുള്ളവര് ജാഗ്രത പാലിക്കണമെന്ന് അധികൃതര് നിര്ദേശം നല്കി. ജലനിരപ്പ് ഉയരാനുള്ള സാധ്യത കണക്കിലെടുത്താണ് മുന്നറിയിപ്പ്. അതേസമയം, ഇടുക്കിയിലെ അപകട സാധ്യതയുള്ള പ്രദേശങ്ങളിലുളള റോഡ് നിര്മാണ പ്രവര്ത്തനങ്ങള് താല്കാലികമായി നിര്ത്തിവെക്കാനും ജില്ലാ കളക്ടര് നിര്ദേശം നല്കി.
സംസ്ഥാനത്ത് അതിശക്തമായി മഴ പെയ്യുന്ന സാഹചര്യത്തില് റവന്യൂ മന്ത്രി കെ രാജന് പൊതുജനങ്ങള്ക്ക് ജാഗ്രതാ നിര്ദേശം നല്കി. ശക്തമായി പെയ്യുന്ന മഴയില് ജനങ്ങള് ജാഗ്രത പാലിക്കണമെന്നും. രാത്രിയാത്രകള് കഴിവതും ഒഴിവാക്കണമെന്നും. ദുരന്തസാധ്യതയുള്ള ഇടങ്ങളില് മഴ ഉണ്ടായാല് ഉടന് തന്നെ ക്യാമ്പുകളിലേക്ക് മാറണമെന്നും മന്ത്രി നിര്ദേശം നല്കി.
3950 ത്തിലധികം ക്യാമ്പുകളില് 5 ലക്ഷത്തിലധികം ആളുകളെ പാര്പ്പിക്കാനുള്ള ക്രമീകരണം ഒരുക്കിയിട്ടുണ്ട്. 3000ത്തിലധികം ക്യാമ്പുകള് ആരംഭിക്കാനുള്ള ക്രമീകരണം തയ്യാറാക്കിയിട്ടുണ്ടെന്നും നിലവില് രണ്ട് ക്യാമ്പുകള് മാത്രമാണ് തുറന്നിട്ടുള്ളതെന്നും മന്ത്രി കൂട്ടിച്ചേര്ത്തു.
എല്ലാ ജില്ലകളിലെയും അവസ്ഥകള് യോഗത്തില് വിലയിരുത്തി. ദുരന്ത സാധ്യതയുള്ള പ്രദേശങ്ങള് ഏതൊക്കെയെന്ന് കണ്ടെത്തി കഴിഞ്ഞു. ജില്ലാ കളക്ടര്മാര്ക്ക് വിവിധ സാഹചര്യങ്ങള് നേരിടാന് ആദ്യപടിയായി ഓരോ കോടി രൂപ വീതം നല്കി. കൂടാതെ തദ്ദേശസ്ഥാപനങ്ങള്ക്കും പണം അനുവദിച്ചു. പഞ്ചായത്തിന് ഒരു ലക്ഷം, മുനിസിപ്പാലിറ്റികള്ക്ക് 3 ലക്ഷം, കോര്പ്പറേഷന് 5ലക്ഷം എന്നിങ്ങനെ നല്കിയിട്ടുണ്ട്. 9 NDRF ടീമുകള് ജൂണ് ഒന്നു മുതല് സജ്ജമാകും. ഒറ്റപ്പെട്ട ഇടങ്ങളില് ഭക്ഷ്യധാന്യങ്ങള് എത്തിക്കാനുള്ള ഏര്പ്പാടുകള് ചെയ്തിട്ടുണ്ടെന്നും അദ്ദേഹം പറഞ്ഞു.
