ന്യൂഡല്ഹി: തീവ്രവാദികളെ പിന്തുണയ്ക്കുന്നത് തുടര്ന്നാല് ശക്തമായി തിരിച്ചടിക്കുമെന്ന് പാക്കിസ്ഥാന് ഇന്ത്യയുടെ മുന്നറിയിപ്പ്. തീവ്രവാദികള് എവിടെയാണെങ്കിലും ഞങ്ങള്ക്ക് പ്രശ്നമില്ലെന്നും അവര് പാക്കിസ്ഥാനില് ഒളിച്ചാല് അവിടേക്കു കടന്നുചെന്ന് നേരിടുമെന്നും വിദേശകാര്യ മന്ത്രി എസ്.ജയശങ്കര് പറഞ്ഞു. ഒരു വിദേശ മാധ്യമത്തിനു നല്കിയ അഭിമുഖത്തിലായിരുന്നു ജയശങ്കറിന്റെ പ്രസ്താവന.
ഭീകരര് ഇന്ത്യയെ ആക്രമിച്ചാല്, പാക്കിസ്ഥാനില് ഉള്പ്പെടെ അവര് എവിടെയായിരുന്നാലും ഞങ്ങള് അവരെ വേട്ടയാടും. അതിര്ത്തി കടന്നുള്ള ഭീകരത തുടരുന്നിടത്തോളം, ഞങ്ങള് തിരിച്ചടിക്കുകയും നമ്മുടെ സ്വയം പ്രതിരോധത്തിന് ആവശ്യമായ എല്ലാ നടപടികളും സ്വീകരിക്കുകയും ചെയ്യും. അത് ജനങ്ങളോടുള്ള അടിസ്ഥാന കടമയാണെന്ന് ജയശങ്കര് കൂട്ടിച്ചേര്ത്തു.
മേയ് 7 നും മേയ് 10നും ഇടയില് ഇന്ത്യ നടത്തിയ സൈനിക നടപടികളുടെ വിജയമാണ് പാക്കിസ്ഥാനെ വെടിനിര്ത്തല് ചര്ച്ചയിലേക്കു കൊണ്ടുവന്നതെന്ന് ജയശങ്കര് ആവര്ത്തിച്ചു. പാക്കിസ്ഥാനിലെ നിരവധി ഭീകരക്യാംപുകളും വ്യോമതാവളങ്ങളും ആക്രമിച്ചുകൊണ്ട് ശക്തമായ മറുപടിയാണ് ഇന്ത്യ നല്കിയത്. റണ്വേകള്, ഭൂഗര്ഭ സൗകര്യങ്ങള്, കമാന്ഡ് ആന്ഡ് കണ്ട്രോള് സൗകര്യങ്ങള് എന്നിവ ഇന്ത്യ ഫലപ്രദമായി ആക്രമിച്ചതായാണ് ഉപഗ്രഹ ചിത്രങ്ങള് സൂചിപ്പിക്കുന്നതെന്നും ജയശങ്കര് പറഞ്ഞു. പത്താം തീയതി യുദ്ധം അവസാനിച്ചത് ഒരു കാരണത്താലാണ്. അതായത് പത്താം തീയതി രാവിലെ ഞങ്ങള് 8 പാക്കിസ്ഥാനി വ്യോമതാവളങ്ങള് ആക്രമിച്ച് അവ പ്രവര്ത്തന രഹിതമാക്കിയെന്നും ജയശങ്കര് പറഞ്ഞു.
