തിരുവനന്തപുരം: സംസ്ഥാനത്ത് ഇരട്ടന്യൂനമര്ദ്ദം ശക്തി പ്രാപിക്കുന്നതിന്റെ ഭാഗമായി അടുത്ത അഞ്ച് ദിവത്തേക്ക് വ്യാപക മഴയ്ക്ക് സാധ്യത. ഇന്നും നാളെയും ഒറ്റപ്പെട്ട ശക്തമായ മഴ തുടരുമെന്നാണ് കേന്ദ്ര കാലാവസ്ഥ കേന്ദ്രത്തിൻ്റെ മുന്നറിയിപ്പില് പറയുന്നത്.
ഇരട്ടന്യൂനമര്ദ്ദം ശക്തി പ്രാപിക്കുന്നതിന്റെ ഭാഗമായാണ് കേരളത്തില് മഴ ശക്തമാകുന്നത്. തെക്കന് ഗുജറാത്തിനു മുകളിലെ ചക്രവാതച്ചുഴി ന്യുനമര്ദ്ദമായി. വടക്ക് പടിഞ്ഞാറന് ബംഗ്ലാദേശിന് മുകളിലായി മറ്റൊരു ന്യുനമര്ദ്ദവും രൂപപ്പെട്ടു. കേരളത്തിന് മുകളില് പടിഞ്ഞാറന് കാറ്റും ശക്തമാകുകയാണ്.
അതേസമയം സംസ്ഥാനത്ത് കണ്ണൂര്, കാസര്കോട് ജില്ലകളില് ഇന്ന് ഓറഞ്ച് അലേര്ട്ടും ആലപ്പുഴ, എറണാകുളം, തൃശൂര്, മലപ്പുറം, കോഴിക്കോട്, വയനാട് ജില്ലകളില് യെല്ലോ അലേര്ട്ടും പ്രഖ്യാപിച്ചിട്ടുണ്ട്. ശക്തമായ തിരമാലക്കും കടല്ക്ഷോഭത്തിനും സാധ്യതയുള്ളതിനാല് കേരളതീരത്ത് മത്സ്യബന്ധനത്തിന് വിലക്ക് ഏര്പ്പെടുത്തിയിട്ടുണ്ട്. 19-ാം തീയതിവരെയാണ് വിലക്ക്.
