കോഴിക്കോട്: കോഴിക്കോട് വീണ്ടും അമീബിക് മസ്തിഷ്ക ജ്വരം സഥിരീകരിച്ചു. കോഴിക്കോട് മെഡിക്കല് കോളേജില് ചികിത്സയിലുള്ളവരാണ് രോഗലക്ഷണങ്ങള് പ്രകടിപ്പിച്ചിരിക്കുന്നത്. ഇവരുടെ രക്തവും സ്രവവും പരിശോധനക്ക് അയച്ചിരുന്നു പരിശോധന ഫലം വന്നതോടെയാണ് രോഗം സ്ഥിരീകരിച്ചത്.ഓമശേരി സ്വദേശി ആയ മൂന്ന് മാസം പ്രായമുള്ള കുഞ്ഞിനും അന്നശേരി സ്വദേശി ആയ യുവാവിനും ആണ് ചികിത്സയിലുള്ളത്. 3 മാസം പ്രായം ഉള്ള കുഞ്ഞിനും രോഗ ലക്ഷണമുള്ളതില് ആരോഗ്യ വകുപ്പ് ജീവനക്കാര്ക്ക് ആശങ്കയുണ്ട്. ജില്ലയില് ഇത്തരം രോഗലക്ഷണങ്ങള് കുറച്ചു ദിവസങ്ങളായി കണ്ടുവരുന്നുണ്ടെന്ന് ആരോഗ്യവകുപ്പ് അധികൃതര് വ്യക്തമാക്കുന്നു. അതേ സമയം രോഗത്തിന്റെ ഉറവിടം കണ്ടെത്തുന്നതില് സങ്കീര്ണതയുണ്ടെന്നും ഡോക്ടര്മാര് പറയുന്നു. പരിശോധന ഫലം വന്നതിന് ശേഷം മറ്റ് നടപടികളിലേക്ക് കടക്കും.
അതേസമയം താമരശ്ശേരി 4 ക്ലാസ് വിദ്യാര്ത്ഥി അമീബിക് മസ്തിഷ്ക ജ്വരം വന്നു മരിച്ച സംഭവത്തില് സ്കൂളില് ബോധവത്കരണം നടത്താനുള്ള തീരുമാനത്തിലാണ് ആരോഗ്യവകുപ്പ്. കൊരങ്ങാട് എല്പി സ്കൂളില് നാളെ ബോധവത്കരണ ക്ലാസ് നല്കും. കുട്ടികള്ക്കും രക്ഷിതാക്കള്ക്കും അധ്യാപകര്ക്കും ആണ് ക്ലാസ് നല്കാനുദ്ദേശിക്കുന്നത്. താമരശ്ശേരിയില് മരിച്ച കുട്ടിയുടെ സഹോദരങ്ങള്ക്കും രോഗലക്ഷണങ്ങളുണ്ടായിരുന്നു.എന്നാല് ഇവര്ക്ക് മറ്റ് ആരോഗ്യപ്രശ്നങ്ങളില്ല. ഇവരുടെ സ്രവം പരിശോധനയ്ക്ക് അയച്ചിട്ടുണ്ട്. ഇവിടെയുള്ള ജലാശയങ്ങളില് കുളിക്കരുത് തുടങ്ങിയ ജാഗ്രത നിര്ദേശങ്ങള് ഇന്നലെ തന്നെ പുറത്തുവിട്ടിരുന്നു.
