തിരുവനന്തപുരം: വാമനപുരത്ത് സ്കൂൾ ബസ് വയലിലേക്ക് മറിഞ്ഞ അപകടത്തിൽ 11 വിദ്യാർത്ഥികൾക്ക് പരിക്കേറ്റു. പരപ്പാറ നോബിൾ സ്കൂളിന്റെ ബസാണ് അപകടത്തിൽപ്പെട്ടത്.ബസിൽ യാത്ര ചെയ്തിരുന്നത് 15 കുട്ടികളാണ്. ഗുരുതരമായ പരിക്കുകളൊന്നുമില്ലെന്ന് വെഞ്ഞാറമൂട് പൊലീസ് അറിയിച്ചു. പരിക്കേറ്റ കുട്ടികളെ വാമനപുരം പ്രാഥമികാരോഗ്യ കേന്ദ്രത്തിൽ പ്രവേശിപ്പിച്ചു.വണ്ടി തിരിക്കാനായി പിന്നോട്ടെടുത്ത സമയത്താണ് ബസ് വയലിലേക്ക് മറിഞ്ഞത്. വിവരം ലഭിച്ചതോടെ വെഞ്ഞാറമൂട് പൊലീസ് സ്ഥലത്തെത്തി രക്ഷാപ്രവർത്തനം നടത്തി.