ദുല്ഖര് സല്മാന്റെ വേഫറെര് ഫിലിംസ് നിര്മ്മിക്കുന്ന ചിത്രം ‘ലോക ചാപ്റ്റര് 2’ പ്രഖ്യാപന വീഡിയോക്ക് യൂട്യൂബില് 5 മില്യണ് കാഴ്ചക്കാര്. ഏതാനും ദിവസങ്ങള്ക്ക് മുന്പ് പുറത്തു വന്ന ഈ പ്രഖ്യാപന വീഡിയോക്ക് ആവേശകരമായ പ്രേക്ഷക പ്രതികരണമാണ് ലഭിക്കുന്നത്. ലോക ചാപ്റ്റര് 2 ല് നായകനായി എത്തുന്ന ടോവിനോ തോമസും ചിത്രത്തിലെ നിര്ണ്ണായകമായ അതിഥി വേഷത്തിലെത്തുന്ന ദുല്ഖര് സല്മാനും ഉള്പ്പെട്ട അതീവ രസകരമായ ഒരു സംഭാഷണ രംഗത്തിലൂടെയാണ് ഈ രണ്ടാം ഭാഗം പ്രഖ്യാപിച്ചത്. കല്യാണി പ്രിയദര്ശന്, നസ്ലന് എന്നിവര് പ്രധാന വേഷങ്ങളിലെത്തിയ ‘ലോക ചാപ്റ്റര് വണ് ചന്ദ്ര’ മലയാളത്തിലെ ഓള് ടൈം ബ്ലോക്ക്ബസ്റ്ററായി മാറിയിരുന്നു. ഡൊമിനിക് അരുണ് രചിച്ചു സംവിധാനം ചെയ്ത ഈ ബിഗ് ബഡ്ജറ്റ് ചിത്രം, അഞ്ചു ഭാഗങ്ങളുള്ള ഒരു ഫാന്റസി സിനിമാറ്റിക് യൂണിവേഴ്സിലെ ആദ്യ ചിത്രമായിരുന്നു.
ഈ യൂണിവേഴ്സിലെ രണ്ടാം ചിത്രമാണ് ടോവിനോ തോമസ് നായകനാവുന്ന ‘ലോക ചാപ്റ്റര് 2’. ആദ്യ ഭാഗത്തില് മൈക്കല് എന്ന കഥാപാത്രമായി അതിഥി വേഷത്തിലാണ് ടോവിനോ അഭിനയിച്ചത്. ചാത്തന് എന്ന ഐതിഹ്യത്തില് നിന്ന് പ്രചോദനം ഉള്ക്കൊണ്ടാണ് മൈക്കല് എന്ന ടോവിനോ കഥാപാത്രത്തെ ഈ യൂണിവേഴ്സില് സൃഷ്ടിച്ചിരിക്കുന്നത്. ചാര്ളി എന്ന കഥാപാത്രമായാണ് ദുല്ഖര് ആദ്യ ഭാഗത്തില് അതിഥി താരമായി എത്തിയത്. ഒടിയന് എന്ന ആതിഥ്യ കഥാപാത്രത്തെ അടിസ്ഥാനമാക്കിയാണ് ചാര്ളിയെ സൃഷ്ടിച്ചത്. മൂത്തോന് എന്ന് വിളിക്കപ്പെടുന്ന കഥാപാത്രമായി മമ്മൂട്ടിയും ഈ സിനിമാറ്റിക് യൂണിവേഴ്സിലെ ശ്കതമായ ഒരു സാന്നിധ്യമായി എത്തും.
അഞ്ചാം ആഴ്ചയും 275 സ്ക്രീനില് നിറഞ്ഞു പ്രദര്ശിപ്പിക്കുന്ന ‘ലോക ചാപ്റ്റര് 1: ചന്ദ്ര’ 280 കോടി ആഗോള ഗ്രോസ് പിന്നീടാണ് കുതിക്കുന്നത്. മലയാളത്തിലെ പുതിയ ഇന്ഡസ്ട്രി ഹിറ്റായും ചിത്രം മാറിക്കഴിഞ്ഞു. മലയാളത്തിന് പുറമെ തമിഴ്, തെലുങ്ക്, ഹിന്ദി, കന്നഡ ഭാഷകളിലും വമ്പന് തരംഗമായി മാറി പാന് ഇന്ത്യന് ഹിറ്റായ ചിത്രം ഇന്ത്യയില് നിന്ന് ഏറ്റവും കൂടുതല് കളക്ഷന് സ്വന്തമാക്കുന്ന മലയാള ചിത്രം കൂടിയായി മാറി. കേരളത്തിന്റെ ചരിത്രത്തിന്റെ ഭാഗമായ കള്ളിയങ്കാട്ട് നീലിയുടെ ഐതിഹ്യ കഥയില് നിന്ന് പ്രചോദനം ഉള്ക്കൊണ്ട് ആണ് ഈ ചിത്രം ഒരുക്കിയത്. ചന്തു സലിംകുമാര്, അരുണ് കുര്യന്, ശരത് സഭ, നിഷാന്ത് സാഗര് എന്നിവരും ചിത്രത്തിന്റെ താരനിരയിലുണ്ട്. ചിത്രം കേരളത്തില് വിതരണം ചെയ്തതും വേഫറെര് ഫിലിംസ് ആണ്.
