കോഴിക്കോട്: പുതിയ ബസ്റ്റാൻഡ് പരിസരത്ത് നടത്തിയ പരിശോധനയിൽ രണ്ട് യുവാക്കളിൽ നിന്ന് വൻ തോതിൽ രാസലഹരി മരുന്നുകൾ പൊലീസ് പിടികൂടി. 250 ഗ്രാം MDMA, 44 ഗ്രാം ടാബ്ലറ്റ് രൂപത്തിലുള്ള MDMA, 99 LSD സ്റ്റാമ്പ് എന്നിവയാണ് പിടിച്ചെടുത്തത്.

കല്ലായി സ്വദേശിയായ ഷഹലിനെയും, തിരുവണ്ണൂർ സ്വദേശിയായ മുഹമ്മദ് ഇർഫാനിനെയും കോഴിക്കോട് സിറ്റി ഡാൻസാഫ് സംഘവും കോഴിക്കോട് കസബ പോലീസും ചേർന്നാണ് അറസ്റ്റ് ചെയ്തത്. ബാംഗ്ലൂരിൽ നിന്ന് ടൂറിസ്റ്റ് ബസ്സിൽ നഗരത്തിലെത്തിയ ഇവർ ബാഗ്ലൂരിൽ നിന്നാണ് ലഹരി മരുന്നുകൾ കൊണ്ടുവന്നതെന്നാണ് വിവരം.

വാട്ടർ ഹീറ്ററിന്റെ സ്റ്റീൽ ടാങ്കിനുള്ളിൽ സെല്ലോ ടേപ്പ് ചുറ്റി ഒളിപ്പിച്ച രീതിയിൽ കടത്താൻ ശ്രമിച്ച ലഹരി മരുന്നുകളാണ് പൊലീസ് കണ്ടെത്തിയത്. സമീപകാലത്ത് കോഴിക്കോട് നഗരത്തിൽ ഉണ്ടായ ഏറ്റവും വലിയ രാസലഹരി വേട്ടയെന്നു അന്വേഷണ സംഘം അറിയിച്ചു.