തൃശ്ശൂർ: മലബാർ സ്വതന്ത്ര സുറിയാനി സഭയുടെ പരമാധ്യക്ഷൻ അഭിവന്ദ്യ സിറിൾ മാർ ബസ്സേലിയോസ് മെത്രാപ്പോലീത്താ തിരുമനസ്സുകൊണ്ട് ആകമാന സുറിയാനി ഓർത്തഡോക്സ് സഭയുടെ പരമാധ്യക്ഷൻ പരിശുദ്ധ മോറാൻ മോർ ഇഗ്നാത്തിയോസ് അഫ്രേം ദ്വിതീയൻ പാത്രിയർക്കീസ് ബാവായെ മഞ്ഞനിക്കര ദയറായിൽ സന്ദർശിച്ചു.
സഭകളുടെ സൗഹൃദവും ഐക്യവും ശക്തിപ്പെടുത്തുന്ന ഈ സന്ദർശനം ആത്മീയ പ്രാധാന്യമുള്ളതായിരുന്നു.സഭാ വൈദീക ട്രസ്റ്റി ഫാ. തോമസ് കുരിയൻ, ഫാ. സി.എം. ഫിലിപ്പോസ്, സഭാ അൽമായ ട്രസ്റ്റി ഗീവർ മാണി പനക്കൽ, സഭാ സെക്രട്ടറി ബിനോയ് പി. മാത്യു എന്നിവർ അഭിവന്ദ്യ പിതാവിനോടൊപ്പം ഉണ്ടായിരുന്നു. സന്ദർശനത്തിനിടെ പരിശുദ്ധ പാത്രിയർക്കീസ് ബാവയോടൊപ്പം ആബൂൻ മോർ ബസ്സേലിയോസ് ജോസഫ് കാതോലിക്കാ ബാവ, കർദിനാൾ മോർ ക്ലീമീസ് കാതോലിക്കാ ബാവ, അഭിവന്ദ്യ മോർ കുരിയാക്കോസ് തെയോഫിലോസ് മെത്രാപ്പോലീത്താ എന്നിവരുമായി കൂടിക്കാഴ്ച നടത്തി.
മഞ്ഞനിക്കര ദയറായിലെ പരിശുദ്ധ ഏലിയാസ് തൃതീയൻ പാത്രിയർക്കീസ് ബാവായുടെ കബറിങ്കലിൽ പ്രാർത്ഥന അർപ്പിച്ച ശേഷമാണ് അഭിവന്ദ്യ പിതാവ് മടങ്ങിയത്. സഭയുടെ പാരമ്പര്യവും ആത്മീയ ബന്ധങ്ങളും കൂടുതൽ ദൃഢമാക്കുന്ന സന്ദർശനമായി ഇത് വിലയിരുത്തപ്പെടുന്നു.
