മലപ്പുറം: നൂറുൽഇസ്ലാം മദ്രസയിൽ ഡിസംബർ 18 ലോക അറബി ഭാഷാദിനം വിവിധ പരിപാടികളോടെ ആഘോഷിച്ചു. ഇതോടൊപ്പം സംസ്ഥാന സർഗമേളയിലേക്ക് യോഗ്യത നേടിയ വിദ്യാർത്ഥികളെയും പരീക്ഷയിൽ ഉയർന്ന മാർക്ക് നേടിയ കുട്ടികളെയും ആദരിക്കുന്ന പ്രത്യേക ചടങ്ങും സംഘടിപ്പിച്ചു. തിരൂരങ്ങാടി മുസ്ലിം ഓർഫനേജ് കമ്മിറ്റി ജനറൽ സെക്രട്ടറി എം.കെ. ബാവ സാഹിബ് അറബി ഭാഷാദിനാഘോഷത്തിന്റെ ഉദ്ഘാടനവും പ്രതിഭകൾക്കുള്ള സമ്മാനദാനവും നിർവ്വഹിച്ചു.
അറബി ഭാഷയുടെ ആത്മീയ സാംസ്കാരിക മൂല്യങ്ങളെ കുറിച്ച് അദ്ദേഹം സംസാരിക്കുകയും കുട്ടികളുടെ നേട്ടങ്ങളെ അഭിനന്ദിക്കുകയും ചെയ്തു. അറബി ഭാഷാ ദിന സന്ദേശം സി.എൻ. അബ്ദുൽ നാസർ മാസ്റ്റർ നൽകി. അറബി ഭാഷയുടെ ചരിത്രപ്രാധാന്യവും ഇന്നത്തെ പ്രസക്തിയും കുട്ടികൾക്ക് മനസ്സിലാകുന്ന രീതിയിൽ അദ്ദേഹം വിശദീകരിച്ചു. പരിപാടിയിൽ സദർ മുദരിസ് എൻ.പി. അബു മാസ്റ്റർ അധ്യക്ഷത വഹിച്ചു. സ്റ്റാഫ് സെക്രട്ടറി മുനീർ താനാളൂർ സ്വാഗതം ആശംസിച്ച ചടങ്ങിൽ ഒ.പി. അനീസ് ജാബിർ മാസ്റ്റർ നന്ദിയും രേഖപ്പെടുത്തി.
മറ്റ് അധ്യാപകരായ വി. അലി മാസ്റ്റർ, കെ. ജംഷീന ടീച്ചർ, കെ. സൈനബ ടീച്ചർ, കെ. ഖദീജ ടീച്ചർ,അനീസ് മാസ്റ്റർ, ഒ.പി.മുംതാസ് ടീച്ചർ,ഫൗസീല ടീച്ചർ, പി.ഫഹദ് മാസ്റ്റർ എന്നിവർ ആശംസകൾ നേർന്നു. രക്ഷിതാക്കളുടെയും കുട്ടികളുടെയും സജീവ പങ്കാളിത്തം പരിപാടിയുടെ വിജയത്തിന് കരുത്തായി. വിദ്യാഭ്യാസത്തോടൊപ്പം ഭാഷാസ്നേഹവും സൃഷ്ടിപരമായ കഴിവുകളും വളർത്തുന്നതിൽ ഇത്തരം പരിപാടികൾ വലിയ പങ്കുവഹിക്കുന്നുവെന്ന് രക്ഷിതാക്കൾ അഭിപ്രായപ്പെട്ടു.
