മലപ്പുറം: വോയിസ് ഓഫ് ഡിസേബിൾഡ് നന്നമ്പ്രയുടെ ആഭിമുഖ്യത്തിൽ സംഘടിപ്പിച്ച ‘എബിലിറ്റി ബ്ലൂംസ് 2K25’ ഭിന്നശേഷി സംഗമത്തിന്റെ ഭാഗമായുള്ള ആദരം സിഗ്നേച്ചർ ഡിസബിലിറ്റി എംപവർമെന്റ് ഫോറം സെക്രട്ടറിയും, സോഷ്യൽ ആക്ടിവിസ്റ്റും, മാധ്യമപ്രവർത്തകനുമായ അക്ഷയ് എം ഏറ്റുവാങ്ങി. ചില ശാരീരിക തടസ്സങ്ങൾ കാരണം തിരൂരങ്ങാടിയിൽ നടന്ന ചടങ്ങിൽ നേരിട്ട് പങ്കെടുക്കാൻ സാധിക്കാത്തതിനെത്തുടർന്ന് സംഘാടകർ വീട്ടിലെത്തിയാണ് ആദരം കൈമാറിയത്.

ഭിന്നശേഷി സമൂഹത്തിന്റെ ശാക്തീകരണത്തിനും അവരുടെ അവകാശങ്ങൾക്കും വേണ്ടി മാധ്യമരംഗത്തും സാമൂഹിക രംഗത്തും അക്ഷയ് നടത്തുന്ന സജീവ ഇടപെടലുകൾ പരിഗണിച്ചാണ് ഈ പുരസ്കാരം. പി.എസ്.എം.ഒ കോളേജ് പൂർവ്വ വിദ്യാർത്ഥി കൂടിയായ അക്ഷയ് ഡിസബിലിറ്റി എംപവർമെന്റ് മേഖലയിൽ നൽകിവരുന്ന സംഭാവനകൾ ചടങ്ങിൽ പ്രശംസിക്കപ്പെട്ടു.

വോയിസ് ഓഫ് ഡിസേബിൾഡ് നന്നമ്പ്ര സെക്രട്ടറി റസീന ടീച്ചർ കൊടിഞ്ഞി, വോയിസ് ഓഫ് ഡിസേബിൾഡ് തിരൂരങ്ങാടി നഗരസഭ സെക്രട്ടറി ജമുലൈസ്, പ്രശസ്ത അവതാരകൻ ശിഹാബ് എലായി എന്നിവർ നേരിട്ടെത്തിയാണ് വീട്ടിൽ വെച്ച് ആദരം സമർപ്പിച്ചത്.തന്റെ പ്രവർത്തനങ്ങൾക്കുള്ള വലിയൊരു പ്രചോദനമാണ് ഈ സ്നേഹാദരമെന്നും വോയിസ് ഓഫ് ഡിസേബിൾഡ് പോലെയുള്ള സംഘടനകളുടെ പ്രവർത്തനങ്ങൾ ഭിന്നശേഷി സമൂഹത്തിന് വലിയ കരുത്താണ് നൽകുന്നതെന്നും അക്ഷയ് നന്ദി പറഞ്ഞു.