കോഴിക്കോട്: വിദ്യാലയ മുറ്റം മനോഹരമാക്കുന്നതിന്റെ ഭാഗമായി ആരാമ്പ്രം ജി.എം.യു.പി സ്കൂളിൽ പി.ടി.എയുടെ നേതൃത്വത്തിൽ നിർമ്മിച്ച പൂന്തോട്ടം ഉദ്ഘാടനത്തിന് സജ്ജമായി. ജനകീയ പങ്കാളിത്തത്തോടെയാണ് സ്കൂൾ ക്യാമ്പസിൽ ആകർഷകമായ ഈ പൂന്തോട്ടം ഒരുക്കിയിരിക്കുന്നത്.
സ്കൂളിലെ എൽ.ബി ബ്ലോക്കിന് മുന്നിലായാണ് വൈവിധ്യമാർന്ന ചെടികളാൽ സമ്പന്നമായ പൂന്തോട്ടം സജ്ജീകരിച്ചിരിക്കുന്നത്. എം.എൽ.എ ഫണ്ട് ഉപയോഗിച്ച് നിർമ്മിച്ച ചിൽഡ്രൻസ് പാർക്കിനോട് ചേർന്നാണ് ഇത് സ്ഥിതി ചെയ്യുന്നത് എന്നത് കുട്ടികൾക്ക് കൂടുതൽ ആസ്വാദ്യകരമാകും. ചുമർചിത്രങ്ങൾ നൽകുന്ന ദൃശ്യഭംഗി പൂന്തോട്ടത്തിന് മാറ്റുകൂട്ടാനായി പ്രശസ്ത കലാകാരൻ സുലൈമാൻ കോട്ടക്കവയൽ വരച്ച മനോഹരമായ ചുമർചിത്രങ്ങളും തയ്യാറായിട്ടുണ്ട്.
പ്രകൃതിഭംഗിയും ചിത്രകലയും ഒത്തുചേരുന്നതോടെ വിദ്യാലയത്തിന്റെ മുഖച്ഛായ തന്നെ മാറിയിരിക്കുകയാണ്. സ്കൂൾ സൗന്ദര്യവൽക്കരണ പദ്ധതിയുടെ ഭാഗമായാണ് ഈ പ്രവർത്തനങ്ങൾ പൂർത്തീകരിച്ചത്. വരും ദിവസങ്ങളിൽ തന്നെ പ്രമുഖരുടെ സാന്നിധ്യത്തിൽ പൂന്തോട്ടം വിദ്യാർത്ഥികൾക്കായി തുറന്നുകൊടുക്കും.
