തൃശ്ശൂർ: ചാലക്കുടി ഗവ.ബോയ്സ് ഹൈസ്കൂൾ ഗ്രൗണ്ടിലെ അന്താരാഷ്ട്ര നിലവാരത്തിലുള്ള ഫുട്ബോൾ സിന്തറ്റിക്ക് ടർഫ് കോർട്ട് നിർമ്മാണം 20 ദിവസത്തിനകം പൂർത്തിയാകുമെന്ന് സനീഷ്കുമാർ ജോസഫ് എം എൽ എ അറിയിച്ചു. പ്രവർത്തിയുടെ നിർമ്മാണപുരോഗതി വിലയിരുത്തുവാൻ നടത്തിയ സ്ഥലസന്ദർശനത്തിന് ശേഷം പ്രതികരിക്കുകയായിരുന്നു അദ്ദേഹം.
അഞ്ച് കോടി രൂപ ഭരണാനുമതി ലഭിച്ച പ്രവർത്തിയുടെ ഭാഗമായി 105 x 68 അളവിൽ അന്താരാഷ്ട്ര നിലവാരത്തിലുള്ള സിന്തറ്റിക് ഫുട്ബോൾ ടർഫ് , സ്റ്റെപ്പ് ഗാലറി, ഓഫീസ് റൂം, ഡ്രെസ്സിങ്ങ് റൂം, ടോയ്ലറ്റ്, ഡ്രൈനേജ്, ഫ്ളഡ് ലൈറ്റ്, ഫെൻസിങ്ങ് തുടങ്ങിയ സൗകര്യങ്ങളാണ് ഒരുക്കുന്നത്.
നിർമ്മാണ പ്രവർത്തികൾ സമയബന്ധിതമായി പൂർത്തിയാക്കണമെന്നും ഇതിനായി കൂടുതൽ തൊഴിലാളികളെ നിയോഗിക്കണമെന്നും എംഎൽഎ ഉദ്യോഗസ്ഥർക്ക് നിർദേശം നല്കി. അന്താരാഷ്ട്ര നിലവാരത്തിലുള്ള ടർഫിൻ്റെ നിർമ്മാണം പൂർത്തിയാകുന്നതോടെ അന്താരാഷ്ട്ര മത്സരങ്ങൾക്ക് വേദിയാകുവാനും അതേ നിലവാരത്തിൽ നാട്ടിലെ കായിക താരങ്ങൾക്ക് പരിശീലനം നല്കുവാനും ഈ സ്റ്റേഡിയം അവസരമൊരുക്കും.
നഗരസഭ ചെയർപേഴ്സൺ ആലിസ് ഷിബു, വൈസ് ചെയർമാൻ കെ വി പോൾ, മുൻ ചെയർപേഴ്സൺ ഷിബു വാലപ്പൻ, കൗൺസിലർമാരായ അഡ്വ. ബിജു എസ് ചിറയത്ത്, സ്പോർട്സ് കേരള ഫൗണ്ടേഷൻ അസി. എക്സിക്യുട്ടീവ് എഞ്ചിനിയർ ഷമീർ കെ എസ് , അസി. എഞ്ചിനിയർ പ്രവീണ എ കെ തുടങ്ങിയവരും സ്ഥലം സന്ദർശിച്ചു.
