ബെംഗളൂരു: ബെംഗളൂരുയിലെ നെലമംഗലയ്ക്ക് സമീപം കാർ നിയന്ത്രണം വിട്ട് കർണാടക സ്റ്റേറ്റ് റോഡ് ട്രാൻസ്പോർട്ട് കോർപ്പറേഷൻ ബസിൽ ഇടിച്ചുണ്ടായ അപകടത്തിൽ അഞ്ചുപേർ മരിച്ചു. ദുർഗ പ്രസാദ്, കേശവ്, ലളിത്, ഹർഷിത്, ധനുഷ് എന്നിവരാണ് മരിച്ചവർ. ഇവരിൽ നാലുപേർ കോളേജ് വിദ്യാർത്ഥികളാണെന്ന് പൊലീസ് അറിയിച്ചു.
അപകടത്തിൽ നാലുപേർ സംഭവസ്ഥലത്തുതന്നെ മരിച്ചു. ഗുരുതരമായി പരിക്കേറ്റ ഒരാൾ ആശുപത്രിയിൽ ചികിത്സയ്ക്കിടെ മരണപ്പെട്ടു. തുംകൂരു ഭാഗത്തേക്ക് സഞ്ചരിക്കുകയായിരുന്ന ടാറ്റ ഇൻഡിക്ക കാർ ഡിവൈഡർ മറികടന്ന് എതിർദിശയിൽ വന്ന കെഎസ്ആർടിസി ബസിൽ ഇടിക്കുകയായിരുന്നു.
കാർ സിസിടിവി ടെക്നീഷ്യനായ ഹർഷിതിന്റെതാണെന്ന് വിവരം. അടുത്തിടെ ഹോസ്കോട്ടെയിൽ രണ്ട് മലയാളി വിദ്യാർത്ഥികൾ ഉൾപ്പെടെ ഏഴുപേർ മരിച്ച അപകടത്തിന്റെ ഞെട്ടൽ മാറും മുമ്പാണ് വീണ്ടും അഞ്ചു യുവാക്കളുടെ ജീവൻ കവർന്നത്.
