ബ്രസീൽ രാഷ്ട്രീയത്തിൽ പുതിയ ചരിത്രമെഴുതി ലൂയിസ് ഇനാസിയോ ലുല ഡ സിൽവ വീണ്ടും പ്രസിഡന്റ് പദത്തിലേക്ക് അവരോധിക്കപ്പെടുമ്പോൾ അതിന് രാഷ്ട്രീയ മാനങ്ങളേറെയുണ്ട്. ട്രംപിന്റെയും തീവ്രവലതുപക്ഷ ശക്തികളുടെയും കടുത്ത വെല്ലുവിളികളെയും അമേരിക്കൻ സമ്മർദ്ദങ്ങളെയും അതിജീവിച്ചാണ് ലാറ്റിനമേരിക്കയിലെ ഏറ്റവും വലിയ രാജ്യത്ത് ലുലയുടെ ഈ അട്ടിമറി വിജയം. തൊഴിലാളിവർഗ രാഷ്ട്രീയത്തിന്റെ കരുത്ത് ഒരിക്കൽക്കൂടി ലോകത്തിന് മുന്നിൽ തെളിയിക്കുന്നതാണ് ഈ തിരഞ്ഞെടുപ്പ് ഫലമെന്ന് ഇടതുപക്ഷം ഉറച്ച് വിശ്വസിക്കുന്നു.

അമേരിക്കൻ തന്ത്രങ്ങളെയും വലതുപക്ഷ ഭിന്നിപ്പുകളെയും തറപറ്റിച്ച ജയം

ട്രംപ് അനുകൂലിയും മുൻ പ്രസിഡന്റ് ജെയർ ബോൾസൊനാരോയുടെ മകനുമായ ഫ്ലാവിയോ ബോൾസൊനാരോയെ പരാജയപ്പെടുത്തിയാണ് ലുല ഡ സിൽവ നാലാം തവണയും ബ്രസീലിന്റെ സാരഥ്യം ഏറ്റെടുക്കുന്നത്. ആവേശകരമായ പോരാട്ടത്തിൽ 51.7 ശതമാനം വോട്ടുകൾ നേടിയാണ് ലുല വിജയം ഉറപ്പിച്ചത്. എതിരാളിയായ ഫ്ലാവിയോ ബോൾസൊനാരോയ്ക്ക് 48.2 ശതമാനം വോട്ടുകളാണ് ലഭിച്ചത്.

തിരഞ്ഞെടുപ്പിലുടനീളം വലതുപക്ഷ ശക്തികളുടെയും അമേരിക്കയുടെയും ശക്തമായ ഇടപെടലുകൾ ചർച്ചയായിരുന്നു. തീവ്രവലതുപക്ഷ സ്ഥാനാർത്ഥിക്ക് അൽഗോരിതം വഴി കൃത്രിമമായി കൂടുതൽ പ്രചാരം നൽകിയതിനെതിരെ ലുലയുടെ പരാതിയിൽ മെറ്റക്കെതിരായി വിധിയുണ്ടായിരുന്നു. കൂടാതെ, ബ്രസീലിനെതിരെ കടുത്ത നയതന്ത്ര സമ്മർദ്ദങ്ങളും ഉപരോധങ്ങളും ഏർപ്പെടുത്താൻ യു.എസ് പ്രസിഡന്റ് ട്രംപ് ശ്രമിച്ചിരുന്നു. എന്നാൽ ഇത്തരം ഇടപെടലുകൾക്കെല്ലാമുള്ള ശക്തമായ ജനവിധിയായി മാറി ഈ തിരഞ്ഞെടുപ്പ് വിജയം.

അവിശ്വസനീയമായ തിരിച്ചുരവ്

ബ്രസീലിന്റെ ചരിത്രത്തിൽ ആദ്യമായാണ് ഒന്നാം ഘട്ടത്തിലെ തോൽവിക്ക് ശേഷം ഒരാൾ രണ്ടാം ഘട്ടത്തിലൂടെ പ്രസിഡന്റാകുന്നത്. ഒക്ടോബർ നാലിന് നടന്ന ആദ്യഘട്ട വോട്ടെടുപ്പിൽ കേവല ഭൂരിപക്ഷമായ 50 ശതമാനം നേടാൻ ആർക്കും സാധിച്ചിരുന്നില്ല. അന്ന് 47 ശതമാനം വോട്ട് നേടി ഫ്ലാവിയോ ബോൾസൊനാരോ മുന്നിലായിരുന്നപ്പോൾ, ലുലയ്ക്ക് 45 ശതമാനം വോട്ടുകൾ മാത്രമാണ് ലഭിച്ചത്. എന്നാൽ, തുടർന്ന് വന്ന മൂന്നാഴ്ച ശക്തമായ പ്രചാരണത്തിലൂടെ തിരിച്ചുപിടിച്ച ലുല, ബ്രസീൽ രാഷ്ട്രീയ ചരിത്രത്തിലെ തന്നെ ഏറ്റവും വലിയ അട്ടിമറി വിജയമാണ് സ്വന്തമാക്കിയത്.

തടവുശിക്ഷ അനുഭവിക്കുന്ന മുൻ പ്രസിഡന്റ് ജെയർ ബോൾസൊനാരോയുടെ പശ്ചാത്തലവും ട്രംപുമായുള്ള ബന്ധവും ഫ്ലാവിയോ പ്രചാരണായുധമാക്കിയിരുന്നു. സമൂഹമാധ്യമങ്ങളിൽ മെറ്റയും വാട്‌സാപ്പും കേന്ദ്രീകരിച്ചുണ്ടായ സെൻസർഷിപ്പ് ആരോപണങ്ങളും നിയമപോരാട്ടങ്ങളും തിരഞ്ഞെടുപ്പ് കാലത്ത് വലിയ വിവാദങ്ങൾക്കാണ് വഴിവെച്ചത്. പെറു, കൊളംബിയ, അർജന്റീന തുടങ്ങിയ അയൽരാജ്യങ്ങളിൽ വലതുപക്ഷ നേതാക്കൾ വിജയം കൈവരിച്ച പശ്ചാത്തലത്തിൽ, ബ്രസീലിൽ ഇടതുപക്ഷം അധികാരം നിലനിർത്തിയത് ലാറ്റിനമേരിക്കൻ രാഷ്ട്രീയത്തിൽ നിർണ്ണായക വഴിത്തിരിവാണ്.

ലോകമെമ്പാടുമുള്ള ജനകീയ പ്രക്ഷോഭങ്ങൾക്ക് പ്രചോദനം

തൊഴിലാളിവർഗ കരുത്തിന് മുന്നിൽ വർഗീയ ഭിന്നിപ്പുകൾക്ക് പിടിച്ചുനിൽക്കാനാവില്ലെന്ന വലിയ സന്ദേശമാണ് ഈ വിജയമെന്ന് രാജ്യസഭാംഗം ഡോ. ജോൺ ബ്രിട്ടാസ് എം.പി അഭിപ്രായപ്പെട്ടു. പ്രധാന എതിരാളിയെ മാത്രമല്ല, ബ്രസീലിനുമേൽ ഉപരോധമേർപ്പെടുത്തിയ ട്രംപിനെയും അമേരിക്കയെയുമാണ് ലുല തറപറ്റിച്ചതെന്നും അദ്ദേഹം വ്യക്തമാക്കി. വിദ്വേഷത്തിന്റെയും വിഭജനത്തിന്റെയും രാഷ്ട്രീയത്തെ ജനങ്ങൾ ഒന്നിച്ചുനിന്നാൽ തകർക്കാൻ സാധിക്കുമെന്ന് ബ്രസീൽ തെളിയിച്ചതായി സി.പി.എം ജനറൽ സെക്രട്ടറി എം.എ. ബേബിയും പ്രതികരിച്ചു. തൊഴിലാളിവകാശങ്ങൾക്കും സാമൂഹിക നീതിക്കും വേണ്ടി പോരാടുന്ന ലോകമെമ്പാടുമുള്ള പ്രസ്ഥാനങ്ങൾക്ക് വലിയ ഊർജ്ജം പകരുന്നതാണ് ഈ ഐതിഹാസിക വിജയം.

വിഭജനത്തിന്റെയും ബാഹ്യ ഇടപെടലുകളുടെയും രാഷ്ട്രീയം ജനകീയ ഐക്യത്തിന് മുന്നിൽ തകർന്നടിയുമെന്നതിന്റെ ഏറ്റവും വലിയ ഉദാഹരണമായി ലുല ഡ സിൽവയുടെ ഈ പുനർവിജയം ചരിത്രത്തിൽ അടയാളപ്പെടുത്തപ്പെടും. സാമ്രാജ്യത്വ താൽപ്പര്യങ്ങളെയും തീവ്രവലതുപക്ഷ ഭിന്നിപ്പുകളെയും അതിജീവിച്ച ലുലയുടെ ഈ വിജയം, നീതിക്കും സമത്വത്തിനും വേണ്ടിയുള്ള പോരാട്ടങ്ങൾക്ക് എന്നും വലിയൊരു വഴികാട്ടിയായിരിക്കും.