തിരുവനന്തപുരം: അനാവശ്യമായി ആൻജിയോപ്ലാസ്റ്റി നടത്തുന്നുവെന്ന മുഖ്യമന്ത്രിയുടെ പ്രസ്താവന തള്ളി ആരോഗ്യമന്ത്രി കെ. മുരളീധരൻ. രോഗികൾക്ക് ആവശ്യകതയില്ലാതെ ആൻജിയോപ്ലാസ്റ്റി നടത്തുന്നതായി ശ്രദ്ധയിൽപ്പെട്ടിട്ടില്ലെന്ന് മന്ത്രി നിയമസഭയിൽ രേഖാമൂലം മറുപടി നൽകി. എംഎൽഎമാരായ പി.പി. സുമോദ്, വി.കെ. സനോജ്, സി.കെ. ഹരീന്ദ്രൻ, കെ. പ്രേമൻ എന്നിവർ ഉന്നയിച്ച ചോദ്യങ്ങൾക്കുള്ള മറുപടിയിലാണ് മന്ത്രിയുടെ വിശദീകരണം.
രോഗികൾക്ക് അനാവശ്യമായി ആൻജിയോപ്ലാസ്റ്റി നടത്തുന്നുവെന്ന ആരോപണം ശ്രദ്ധയിൽപ്പെട്ടിട്ടുണ്ടോ, അത്തരത്തിൽ ചികിത്സ നടത്തുന്ന ആശുപത്രികൾ ഏതൊക്കെയാണ് തുടങ്ങിയ കാര്യങ്ങളാണ് എംഎൽഎമാർ ചോദിച്ചത്. ആവശ്യമില്ലാത്ത രോഗികൾക്ക് ആൻജിയോപ്ലാസ്റ്റി നടത്തുന്ന സാഹചര്യം തടയാൻ ആരോഗ്യവകുപ്പ് നിർദേശങ്ങൾ നൽകിയിട്ടുണ്ടോയെന്നും ആരാഞ്ഞു. എന്നാൽ, ഇത്തരമൊരു സാഹചര്യം ശ്രദ്ധയിൽപ്പെട്ടിട്ടില്ലെന്നായിരുന്നു മന്ത്രിയുടെ മറുപടി.
ആൻജിയോപ്ലാസ്റ്റിയുടെ പേരിൽ സ്വകാര്യ ആശുപത്രികൾ അമിത നിരക്ക് ഈടാക്കി രോഗികളെ ചൂഷണം ചെയ്യുന്നുണ്ടോയെന്നും എംഎൽഎമാർ ചോദിച്ചു. ഇതിന് മറുപടിയായി, ചില പരാതികൾ ശ്രദ്ധയിൽപ്പെട്ടിട്ടുണ്ടെന്ന് മന്ത്രി വ്യക്തമാക്കി.
സ്വകാര്യ ആശുപത്രികളിലെ ചികിത്സാ ചൂഷണം സംബന്ധിച്ച പരാതികൾ അന്വേഷിക്കുന്നതിനായി പ്രിൻസിപ്പൽ സെക്രട്ടറി അധ്യക്ഷനായി സമിതി രൂപീകരിച്ചിട്ടുണ്ടെന്നും മന്ത്രി അറിയിച്ചു.
നേരത്തെ, കോഴിക്കോട് നടന്ന പൊതുപരിപാടിയിൽ മുഖ്യമന്ത്രി വി.ഡി. സതീശൻ ആൻജിയോപ്ലാസ്റ്റിയുമായി ബന്ധപ്പെട്ട് നടത്തിയ പരാമർശങ്ങളാണ് വിവാദത്തിന് തുടക്കമിട്ടത്. ആവശ്യമില്ലാത്ത രോഗികൾക്കുപോലും ആൻജിയോപ്ലാസ്റ്റി നടത്തുന്ന സാഹചര്യം ഒഴിവാക്കാൻ ബോധവത്കരണ ക്യാമ്പയിൻ വേണമെന്നായിരുന്നു മുഖ്യമന്ത്രിയുടെ അഭിപ്രായം.
ചില സാഹചര്യങ്ങളിൽ രോഗികൾക്ക് ആൻജിയോപ്ലാസ്റ്റി നിർദേശിക്കുന്നതിനെക്കുറിച്ച് ആശങ്ക പ്രകടിപ്പിച്ച മുഖ്യമന്ത്രി, ചികിത്സ ആവശ്യമാണോ, മരുന്നിലൂടെ നിയന്ത്രിക്കാവുന്ന സാഹചര്യമാണോ തുടങ്ങിയ കാര്യങ്ങളിൽ രോഗികൾ രണ്ടാമതൊരു മെഡിക്കൽ അഭിപ്രായം തേടേണ്ടതിന്റെ പ്രാധാന്യവും ചൂണ്ടിക്കാട്ടിയിരുന്നു.
ആൻജിയോപ്ലാസ്റ്റിയുടെ പേരിൽ വലിയ സാമ്പത്തിക ബാധ്യത നേരിടുന്ന രോഗികളുടെ സാഹചര്യം പരാമർശിച്ചായിരുന്നു മുഖ്യമന്ത്രിയുടെ വിമർശനം. എന്നാൽ, ഈ പരാമർശങ്ങൾക്കെതിരെ ഡോക്ടർമാർ ഉൾപ്പെടെയുള്ളവർ രംഗത്തെത്തിയിരുന്നു.
ആരോഗ്യമന്ത്രിയുടെ നിയമസഭാ മറുപടിയും മുഖ്യമന്ത്രിയുടെ മുൻ പ്രസ്താവനയും പുറത്തുവന്നതോടെ ആൻജിയോപ്ലാസ്റ്റിയുടെ ആവശ്യകത, സ്വകാര്യ ആശുപത്രികളിലെ ചികിത്സാ ചെലവ്, രോഗികളുടെ അവകാശങ്ങൾ എന്നിവ സംബന്ധിച്ച ചർച്ച വീണ്ടും സജീവമാകുകയാണ്.
