കോഴിക്കോട്: ശമ്പളവർധന ആവശ്യപ്പെട്ട് യുണൈറ്റഡ് നഴ്സസ് അസോസിയേഷൻ (യു.എൻ.എ.) നേതൃത്വത്തിൽ സ്വകാര്യ ആശുപത്രികളിലെ നഴ്സുമാർ നടത്തുന്ന അനിശ്ചിതകാല സമരം തുടരുന്നതിനിടെ നിരവധി ആശുപത്രികളിലെ പ്രവർത്തനം ഗുരുതരമായി ബാധിച്ചു. പല ആശുപത്രികളും രോഗികളെ ഡിസ്ചാർജ് ചെയ്യുകയും പുതിയ കിടത്തിച്ചികിത്സ പ്രവേശനം നിർത്തുകയും ചെയ്തു. അടിയന്തര വിഭാഗങ്ങളും ഐ.സി.യു. പോലുള്ള അവശ്യസേവനങ്ങളും മാത്രമാണ് മിക്കിടത്തും പ്രവർത്തിക്കുന്നത്. ശസ്ത്രക്രിയകൾ മാറ്റിവെച്ചതോടെ ഡോക്ടർമാർക്ക് തന്നെ ചില നഴ്സിങ് സേവനങ്ങൾ നിർവഹിക്കേണ്ട സാഹചര്യമുണ്ടായി.

കോഴിക്കോട് സിവിൽസ്റ്റേഷനുമുൻപിൽ നഴ്സുമാർ സമരം നടത്തി. അടിസ്ഥാനശമ്പളം 40,000 രൂപയാക്കണമെന്നാണ് ആവശ്യം; നിലവിൽ അത് 22,400 രൂപയാണ്. സമരത്തെ പിന്തുണച്ച ചില നഴ്സുമാരെ പിരിച്ചുവിട്ടതും മാനേജ്മെന്റിനെതിരായ പ്രതിഷേധം ശക്തമാക്കി. ആവശ്യങ്ങൾ അംഗീകരിക്കുന്നതുവരെ സമരം തുടരുമെന്ന് നഴ്സുമാർ അറിയിച്ചു.