മലപ്പുറം: നിയമസഭാ തിരഞ്ഞെടുപ്പിന്റെ സ്ഥാനാർത്ഥി പ്രഖ്യാപനം ഔദ്യോഗികമായി പുറത്തുവരുന്നതിന് മുൻപേ തവനൂർ മണ്ഡലത്തിൽ കോൺഗ്രസ് രാഷ്ട്രീയത്തിൽ പോസ്റ്റർ യുദ്ധം മുറുകുന്നു. കോൺഗ്രസ് നേതാവ് സന്ദീപ് വാര്യരെ മണ്ഡലത്തിലേക്ക് സ്വാഗതം ചെയ്തുകൊണ്ട് പൊറൂക്കര മണ്ഡലം കോൺഗ്രസ് കമ്മിറ്റിയുടെ പേരിൽ സ്ഥാപിച്ച ഫ്ലക്സ് ബോർഡുകളാണ് ഇപ്പോൾ വലിയ ചർച്ചകൾക്ക് വഴിവെച്ചിരിക്കുന്നത്. തവനൂരിലെ കോൺഗ്രസ് സ്ഥാനാർത്ഥിയെ ഇതുവരെ ഔദ്യോഗികമായി പ്രഖ്യാപിച്ചിട്ടില്ല എന്നതും ശ്രദ്ധേയമാണ്.
മണ്ഡലത്തിൽ എൽഡിഎഫ് സ്ഥാനാർത്ഥിയായി കെ.ടി. ജലീൽ തന്നെ മത്സരിക്കുമെന്ന് ഏകദേശം ഉറപ്പായ സാഹചര്യത്തിൽ, അദ്ദേഹത്തെ നേരിടാൻ യുഡിഎഫ് ആരെ ഇറക്കും എന്നതാണ് രാഷ്ട്രീയ ലോകം ഉറ്റുനോക്കുന്നത്. നിലവിലെ ഡിസിസി പ്രസിഡന്റ് വി.എസ്. ജോയ്, സന്ദീപ് വാര്യർ എന്നിവരുടെ പേരുകളാണ് കോൺഗ്രസിന്റെ പരിഗണനയിലുള്ള പ്രധാന പേരുകൾ. ഇവരിലൊരാൾ സ്ഥാനാർത്ഥിയാകുമെന്ന് സൂചനകളുണ്ടെങ്കിലും പാർട്ടിയിൽ നിന്ന് ഇതുവരെ വ്യക്തമായ തീരുമാനമുണ്ടായിട്ടില്ല.
സ്ഥാനാർത്ഥി നിർണ്ണയ ചർച്ചകൾ പുരോഗമിക്കവെ ‘സന്ദീപ് വാര്യർക്ക് സ്വാഗതം’ എന്ന വാചകങ്ങളോടെ താഴെത്തട്ടിലുള്ള പ്രവർത്തകർ തന്നെ രംഗത്തിറങ്ങിയത് നേതൃത്വത്തെ അമ്പരപ്പിച്ചിട്ടുണ്ട്. വി.എസ്. ജോയിയും സന്ദീപ് വാര്യരും ഒരുപോലെ പരിഗണിക്കപ്പെടുന്ന സാഹചര്യത്തിൽ വരും ദിവസങ്ങളിൽ പുറത്തുവരുന്ന സ്ഥാനാർത്ഥി പട്ടികയോടെ മാത്രമേ തവനൂരിലെ ചിത്രം പൂർണ്ണമായും വ്യക്തമാകൂ.
