ആലപ്പുഴ:ആലപ്പുഴയുടെ മാത്രമല്ല, സംസ്ഥാനത്തിന്റെ തന്നെ നേതാക്കളായി വളർന്ന ഒട്ടേറെപ്പേരുടെ സാന്നിധ്യമില്ലാത്ത തിരഞ്ഞെടുപ്പാണ് ഇക്കുറി നടക്കുന്നത്. അതിൽ ഏറ്റവും പ്രധാനപ്പെട്ടത് വിപ്ലവനായിക കെ.ആർ. ഗൗരിയമ്മയുടെ അഭാവമാണ്. 1957 മുതൽ 2010 വരെ കേരളത്തിന്റെ തിരഞ്ഞെടുപ്പ് ചരിത്രത്തിലെ അവിഭാജ്യ ഘടകമായിരുന്ന ഗൗരിയമ്മ 2021-ലെ തിരഞ്ഞെടുപ്പിന് ശേഷമാണ് അന്തരിച്ചത്. അതിനാൽ തന്നെ ഗൗരിയമ്മയുടെ സാന്നിധ്യമില്ലാതെ കേരളം നേരിടുന്ന ആദ്യ നിയമസഭാ തിരഞ്ഞെടുപ്പായി ഇത് മാറുന്നു.
നിയമസഭ രൂപവത്കരിക്കുന്നതിനും മുൻപേ തുടങ്ങിയതാണ് ഗൗരിയമ്മയുടെ തിരഞ്ഞെടുപ്പ് യാത്ര. പുന്നപ്ര-വയലാർ സമരത്തിന് ശേഷം കമ്മ്യൂണിസ്റ്റ് പാർട്ടിയിലെത്തിയ അവർ 1948-ൽ തിരുവിതാംകൂർ സഭയിലേക്കാണ് ആദ്യമായി മത്സരിച്ചത്. ആ പോരാട്ടത്തിൽ പരാജയപ്പെട്ടെങ്കിലും 1952-ലും 54-ലും തിരുക്കൊച്ചി സഭയിലേക്ക് വിജയിച്ചുകൊണ്ട് തന്റെ ജൈത്രയാത്ര ആരംഭിച്ചു. 1957-ൽ കേരളപ്പിറവിക്ക് ശേഷമുള്ള ആദ്യ നിയമസഭാ തിരഞ്ഞെടുപ്പിൽ ചേർത്തലയിൽ നിന്ന് വിജയിച്ച ഗൗരിയമ്മ സംസ്ഥാനത്തെ ആദ്യ വനിതാ മന്ത്രിയെന്ന റെക്കോർഡും സ്വന്തമാക്കി. 1960-ലും ഇതേ മണ്ഡലത്തിൽ വിജയം ആവർത്തിച്ചു.
1964-ലെ കമ്മ്യൂണിസ്റ്റ് പാർട്ടി പിളർപ്പിന് ശേഷം സി.പി.എമ്മിനൊപ്പം നിന്ന ഗൗരിയമ്മ 1965-ൽ അരൂരിലേക്ക് ചുവടുമാറ്റി. അന്ന് തുടങ്ങിയ അരൂർ ബന്ധം 2006 വരെ നീണ്ടുനിന്നു. ഇതിനിടയിൽ 1977-ൽ സി.പി.ഐയിലെ പി.എസ്. ശ്രീനിവാസനോട് പരാജയപ്പെട്ടെങ്കിലും 80-ൽ ശക്തമായ തിരിച്ചുവരവ് നടത്തി. പിന്നീട് 1994-ൽ സി.പി.എം വിട്ട് ജെ.എസ്.എസ് രൂപീകരിക്കുകയും യു.ഡി.എഫ് ഘടകകക്ഷിയായി 1996-ലും 2001-ലും അരൂരിൽ നിന്ന് വീണ്ടും നിയമസഭയിലെത്തുകയും ചെയ്തു. മണ്ഡല പുനർനിർണയത്തിന് ശേഷം 2011-ൽ യു.ഡി.എഫ് സ്ഥാനാർത്ഥിയായി വീണ്ടും ചേർത്തലയിൽ മടങ്ങിയെത്തിയെങ്കിലും പി. തിലോത്തമനോട് പരാജയപ്പെട്ടതോടെയാണ് അവർ സജീവ തിരഞ്ഞെടുപ്പ് രാഷ്ട്രീയത്തിൽ നിന്ന് പിന്മാറിയത്. എങ്കിലും 2021 വരെ കേരള രാഷ്ട്രീയത്തിലെ സജീവ സാന്നിധ്യമായി ഗൗരിയമ്മ നിലകൊണ്ടു.
