മലപ്പുറം:വി.ഡി സതീശനെ അടുത്ത മുഖ്യമന്ത്രിയായി പ്രഖ്യാപിച്ചതിനെ സ്വാഗതം ചെയ്ത് മുസ്ലിം ലീഗ് സംസ്ഥാന അധ്യക്ഷൻ പാണക്കാട് സയ്യിദ് സാദിഖലി ശിഹാബ് തങ്ങൾ രംഗത്തെത്തി. കേരളത്തിന്റെ നഷ്ടപ്പെട്ട പ്രതാപം തിരിച്ചുപിടിക്കാനുള്ള കാലമാണ് വരാനിരിക്കുന്നതെന്നും, ജനങ്ങൾ ആഗ്രഹിച്ച വ്യക്തിയെത്തന്നെയാണ് നേതൃസ്ഥാനത്ത് ലഭിച്ചിരിക്കുന്നതെന്നും അദ്ദേഹം ഫേസ്ബുക്ക് കുറിപ്പിലൂടെ വ്യക്തമാക്കി. വി.ഡി സതീശൻ കേരളത്തെ നല്ല നാളെകളിലേക്ക് നയിക്കുമെന്ന് പ്രത്യാശ പ്രകടിപ്പിച്ച തങ്ങൾ, കഴിഞ്ഞ പത്ത് വർഷമായി കേവലമൊരു പരസ്യവാചകം മാത്രമായി മാറിയ ‘നമ്പർ വൺ കേരളം’ എന്ന പദവി ഇനി യാഥാർത്ഥ്യമാക്കണമെന്നും കൂട്ടിച്ചേർത്തു.
വികസന സൂചികകളിൽ കേരളത്തിന് നഷ്ടമായ ഒന്നാം സ്ഥാനം തിരിച്ചുപിടിക്കുകയും കഴിഞ്ഞ ഭരണകാലത്തുണ്ടായ ദുർഭരണത്തിന്റെ വിള്ളലുകൾ പരിഹരിക്കുകയുമാണ് വരുംകാലത്തെ ലക്ഷ്യം. കേരളത്തിന്റെ ഉയിർത്തെഴുന്നേൽപ്പിന്റെ കാലമാണ് ഇനി വരാനിരിക്കുന്നതെന്നും ജനവികാരം ഉൾക്കൊണ്ടുള്ള ഭരണത്തിന് നേതൃത്വം നൽകാൻ അനുയോജ്യനായ വ്യക്തിയാണ് വി.ഡി സതീശനെന്നും അദ്ദേഹം കുറിച്ചു. ലക്ഷ്യങ്ങൾ കൈവരിക്കാൻ മുന്നണി സംവിധാനം ഒറ്റക്കെട്ടായി നീങ്ങുന്നത് വലിയ കരുത്താകും. ജനമിടിപ്പിനൊപ്പം ചേരാനും കേരളത്തിന്റെ സമഗ്രമായ പുരോഗതി സാധ്യമാക്കാനും പുതിയ മുഖ്യമന്ത്രിക്ക് സാധിക്കട്ടെയെന്നും അദ്ദേഹം ആശംസിച്ചു.
