പത്തനംതിട്ട: പത്തനംതിട്ട മൂഴിയാറിൽ കെഎസ്ഇബി ഉദ്യോഗസ്ഥന് നേരെ കാട്ടാന ആക്രമണം. അസിസ്റ്റന്റ് എക്സിക്യൂട്ടീവ് എൻജിനീയർ ഷിബു തങ്കപ്പൻക്ക് ആക്രമണത്തിൽ പരിക്കേറ്റു. ഇന്ന് ഉച്ചയ്ക്ക് 1.30ഓടെയാണ് സംഭവം നടന്നത്. ബൈക്കിൽ ഓഫീസിലേക്ക് പോകുന്നതിനിടെ വേലുത്തോട് സമീപത്തുവച്ചാണ് കാട്ടാന ആക്രമിച്ചത്. മൂഴിയാർ ഓപ്പറേഷൻ സബ് ഡിവിഷൻ ഓഫീസിലേക്ക് പോകുന്നതിനിടെയായിരുന്നു ആക്രമണം. ഷിബു തങ്കപ്പന് കാലിന് ഒടിവും ശരീരമാസകലം പരിക്കുകളും ഉണ്ടായിട്ടുണ്ട്. പരിക്കേറ്റ ഉദ്യോഗസ്ഥനെ ഉടൻ ആശുപത്രിയിൽ പ്രവേശിപ്പിച്ചു. പ്രദേശത്ത് വന്യമൃഗ ശല്യം വർധിക്കുന്നതായി നാട്ടുകാർ ആശങ്ക പ്രകടിപ്പിച്ചു.