തിരുവനന്തപുരം: സിഎംആർഎൽ-എക്സാലോജിക് സാമ്പത്തിക ഇടപാടുകളുമായി ബന്ധപ്പെട്ട അന്വേഷണത്തിൽ വീണ വിജയന്റെ ബാങ്ക് ലോക്കർ പരിശോധിക്കാൻ എൻഫോഴ്സ്മെന്റ് ഡയറക്ടറേറ്റ് (ഇ.ഡി.) നീക്കം തുടങ്ങി. എച്ച്ഡിഎഫ്സി ബാങ്കിലെ ലോക്കറിലേക്കാണ് അന്വേഷണം വ്യാപിപ്പിക്കാൻ ഉദ്യോഗസ്ഥർ ഒരുങ്ങുന്നത്.
നേരത്തെ അന്വേഷണത്തിന്റെ ഭാഗമായി വീണ വിജയന്റെ ബാങ്ക് അക്കൗണ്ട് ഇ.ഡി. മരവിപ്പിച്ചിരുന്നു. എന്നാൽ അക്കൗണ്ടിൽ രണ്ട് ലക്ഷത്തിൽ താഴെ മാത്രമാണ് നിക്ഷേപമുണ്ടായിരുന്നതെന്നാണ് വിവരം. തുടർന്നാണ് അതേ ബാങ്കിൽ വീണയ്ക്ക് ലോക്കർ ഉള്ളതായി കണ്ടെത്തിയതോടെ ലോക്കർ പരിശോധിക്കാനുള്ള നടപടികളിലേക്ക് അന്വേഷണസംഘം കടന്നത്.
സിഎംആർഎല്ലിൽ നിന്ന് എക്സാലോജിക് വഴി ലഭിച്ച പണം എങ്ങനെ വിനിയോഗിച്ചുവെന്നതാണ് ഇ.ഡി. പ്രധാനമായും അന്വേഷിക്കുന്നത്. ഇതിന്റെ ഭാഗമായി വീണ വിജയന്റെ വസതിയിലും പരിശോധന നടത്തിയിരുന്നു. പരിശോധനയ്ക്കിടെ ലഭിച്ച വിവരങ്ങളുടെ അടിസ്ഥാനത്തിലാണ് ബാങ്ക് അക്കൗണ്ട് മരവിപ്പിച്ചതും തുടർന്ന് ലോക്കറിലേക്ക് അന്വേഷണം വ്യാപിപ്പിക്കുന്നതും.
സാമ്പത്തിക ഇടപാടുകളുമായി ബന്ധപ്പെട്ട കൂടുതൽ രേഖകളും വിവരങ്ങളും കണ്ടെത്തുകയാണ് ലോക്കർ പരിശോധനയുടെ ലക്ഷ്യമെന്നാണ് സൂചന. ഇതിനിടെ, ഇ.ഡി. അന്വേഷണം തടയണമെന്നാവശ്യപ്പെട്ട് സിഎംആർഎൽ സമർപ്പിച്ച ഹർജി തിങ്കളാഴ്ച കോടതി പരിഗണിക്കും.
ഹൈക്കോടതിയുടെ അനുമതി ലഭിച്ചതിനെ തുടർന്ന് കേസിൽ കൂടുതൽ ശക്തമായ അന്വേഷണ നടപടികളുമായി മുന്നോട്ടുപോകാനാണ് ഇ.ഡിയുടെ തീരുമാനം. അന്വേഷണം നിർണായക ഘട്ടത്തിലേക്ക് കടക്കുന്നതായാണ് വിലയിരുത്തൽ.
