കൊൽക്കത്ത: പശ്ചിമബംഗാളിൽ തൃണമൂൽ കോൺഗ്രസിനുള്ളിൽ പ്രതിസന്ധി തുടരുന്നതിനിടെ മമതാ ബാനർജിക്ക് തിരിച്ചടി. കൊൽക്കത്ത മേയർ ഫിർഹാദ് ഹക്കീം സ്ഥാനം രാജിവെച്ചു. പാർട്ടി നേതൃത്വം അദ്ദേഹത്തിന്റെ രാജി അംഗീകരിച്ചതായി റിപ്പോർട്ടുകൾ പറയുന്നു.
ബംഗാളിൽ ബിജെപി അധികാരത്തിൽ വന്നതിന് ശേഷം പ്രവർത്തിക്കാൻ ബുദ്ധിമുട്ടുണ്ടെന്ന് ചൂണ്ടിക്കാട്ടിയാണ് ഹക്കീം നേരത്തെ രാജി അപേക്ഷ സമർപ്പിച്ചതെന്ന് സൂചനയുണ്ട്. രാജിവെക്കരുതെന്ന് മമതാ ബാനർജി ആവശ്യപ്പെട്ടിരുന്നുവെങ്കിലും, അദ്ദേഹം വീണ്ടും അനുമതി തേടുകയായിരുന്നു. തുടർന്ന് രാജിക്ക് അനുമതി നൽകിയതായി ടിഎംസി എംഎൽഎ കുനാൽ ഘോഷ് മാധ്യമങ്ങളോട് പറഞ്ഞു.
2018 മുതൽ കൊൽക്കത്ത മേയറായി പ്രവർത്തിച്ചിരുന്ന ഫിർഹാദ് ഹക്കീം, തൃണമൂൽ കോൺഗ്രസിന്റെ പ്രധാന ന്യൂനപക്ഷ നേതാക്കളിൽ ഒരാളാണ്. വർഷങ്ങളായി സംസ്ഥാന സർക്കാരിൽ വിവിധ മന്ത്രിസ്ഥാനങ്ങളും അദ്ദേഹം വഹിച്ചിട്ടുണ്ട്. കൊൽക്കത്ത മുനിസിപ്പൽ കോർപ്പറേഷൻ 2010 മുതൽ ടിഎംസിയുടെ നിയന്ത്രണത്തിലാണ്.
ഇതിനിടെ, പശ്ചിമബംഗാൾ നിയമസഭയിൽ പ്രതിപക്ഷ നേതൃസ്ഥാനവുമായി ബന്ധപ്പെട്ടും വിവാദം ഉയർന്നു. ടിഎംസിയിൽ നിന്ന് പുറത്താക്കിയ വിമത നേതാവ് ഋതബ്രത ബാനർജിയെ പ്രതിപക്ഷ നേതാവായി സ്പീക്കർ തെരഞ്ഞെടുത്തു. 59 എംഎൽഎമാരുടെ പിന്തുണ അവകാശപ്പെട്ടാണ് അദ്ദേഹത്തിന്റെ നിയമനം നടന്നത്.
ടിഎംസി ആദ്യം ഔദ്യോഗികമായി നിർദ്ദേശിച്ച ശോഭൻദേവ് ചട്ടോപാധ്യായയെ പരിഗണിക്കാതെയാണ് ഈ തീരുമാനം ഉണ്ടായത്. ഒപ്പുകളുടെ ആധികാരികതയെ ചൊല്ലിയുള്ള ആരോപണങ്ങളും പാർട്ടിക്കുള്ളിൽ ഭിന്നത വർധിപ്പിച്ചിട്ടുണ്ട്.
കൂറുമാറ്റ നിരോധന നിയമപ്രകാരം നിലനിൽക്കുന്ന രാഷ്ട്രീയ സമവാക്യങ്ങൾ പശ്ചിമബംഗാളിലെ ഭരണ–പ്രതിപക്ഷ രാഷ്ട്രീയത്തെ കൂടുതൽ സങ്കീർണമാക്കുന്ന സാഹചര്യമാണ് നിലവിലുള്ളത്.
