കൊച്ചി: നടി അന്സിബ ഹസന്റെ പരാതിയെ തുടർന്ന് മൊഴി നൽകി നടൻ ടിനി ടോം. തനിക്കെതിരായ പരാതി അടിസ്ഥാനരഹിതമാണെന്ന് ടിനി ടോം പറഞ്ഞു. അന്സിബ മതം മാറ്റാൻ ശ്രമിച്ചു എന്ന തരത്തിലുള്ള പ്രസ്താവന താൻ നടത്തിയിട്ടില്ലെന്നും, ഇത് വ്യക്തി വൈരാഗ്യത്തെ തുടർന്നുള്ള പരാതിയാണെന്നും ടിനി ടോം വ്യക്തമാക്കി. ഒരു സ്റ്റേജ് ഷോയ്ക്കിടെ നടി നീനാ കുറുപ്പുമായി ഉണ്ടായ തർക്കത്തിന് പിന്നാലെയാണ് വിവാദങ്ങൾ ആരംഭിച്ചതെന്നും അദ്ദേഹം പറഞ്ഞു.
അന്വേഷണത്തിന്റെ ഭാഗമായി അമ്മ സംഘടനയുടെ പ്രസിഡന്റ് ശ്വേതാ മേനോന്റെ മൊഴിയും പൊലീസ് രേഖപ്പെടുത്തി. വിഷയത്തെ കുറിച്ച് അറിയില്ലെന്നും, ടിനി ടോം വർഗീയ പരാമർശം നടത്തിയതായി ശ്രദ്ധയിൽപ്പെട്ടിട്ടില്ലെന്നും ശ്വേതാ മേനോൻ മൊഴി നൽകി.
ജൂൺ 1-നാണ് അന്സിബ ടിനി ടോമിനെതിരെ പരാതി നൽകിയത്. തനിക്കെതിരെ അപവാദ പ്രചാരണങ്ങൾ നടത്തിയതായും, തന്റെ ഡ്രൈവറെ മതം മാറ്റാൻ ശ്രമിച്ചുവെന്നതുപോലുള്ള വ്യാജ ആരോപണങ്ങൾ ഉന്നയിച്ചതായും നടി പരാതിയിൽ ആരോപിച്ചിരുന്നു. ഇതുമൂലം താനും കുടുംബവും മാനസിക പീഡനത്തിന് ഇരയായതായും അവർ പറഞ്ഞിരുന്നു.
എന്നാൽ ആരോപണങ്ങൾ ടിനി ടോം നിഷേധിച്ചിട്ടുണ്ട്. സ്റ്റേജ് ഷോകളിൽ സാധാരണയായി തർക്കങ്ങൾ ഉണ്ടാകാറുണ്ടെന്നും, താൻ ആരെയും അപമാനിച്ചിട്ടില്ലെന്നും അദ്ദേഹം പറഞ്ഞു. ഇതിനിടെ നടി നീനാ കുറുപ്പ്, ടിനി ടോം അന്സിബയ്ക്കെതിരെ അപവാദം പ്രചരിപ്പിച്ചതിന് താൻ സാക്ഷിയാണെന്ന് ആരോപിച്ചു. ടിനി ടോം സ്ത്രീകളെ അപമാനിക്കുന്ന രീതിയിൽ പെരുമാറാറുണ്ടെന്നും, എതിർത്താൽ ഭീഷണിപ്പെടുത്തുന്ന സ്വഭാവം ഉണ്ടെന്നും നീനാ കുറുപ്പ് പ്രതികരിച്ചു. സംഭവത്തിൽ പൊലീസ് അന്വേഷണം തുടരുകയാണ്. റിപ്പോർട്ട് ഉടൻ സമർപ്പിക്കുമെന്ന് അറിയിച്ചിട്ടുണ്ട്.
