തിരുവനന്തപുരം: കേരളത്തിലെ ജെൻ സി തലമുറയ്ക്ക് പുത്തൻ ഉണർവേകുന്ന പദ്ധതികളുമായി വിഡി സതീശൻ സർക്കാരിന്റെ ആദ്യ ബജറ്റ്. ബജറ്റിൽ ജെൻ സികൾക്കുള്ള സ്റ്റാർട്ട് അപ്പിനായി 50 കോടി വകയിരുത്തി. ഡിജിറ്റൽ ധാർമ്മികത, സ്വകാര്യതയുടെ സംരക്ഷണം, സൈബർ സുരക്ഷ, മാനുഷിക മൂല്യങ്ങൾ എന്നിവയ്ക്ക് പ്രാധാന്യം നൽകിക്കൊണ്ടുള്ള സ്റ്റാർട്ട് അപ്പുകൾ, ഇന്നോവേഷൻ ഹബുകൾ, ​ഗവേഷണ കേന്ദ്രങ്ങൾ, സ്മാർട്ട് വ്യവസായങ്ങൾ എന്നിവ വികസിപ്പിക്കാൻ യുവ തലമുറയുടെ സാങ്കേതിക മികവുകൾ ഇതിലൂടെ ഉറപ്പിക്കാൻ സാധിക്കുമെന്ന് ബജറ്റ് അവതരണത്തിനിടെ മുഖ്യമന്ത്രി പറഞ്ഞു.

ഇന്ന് ലോകത്തെ ഏറ്റവും വേ​ഗത്തിൽ മാറ്റിമറിയ്ക്കുന്നവരാണ് ജെൻ സികളെന്നും ഡിജിറ്റൽ യു​ഗത്തിൽ ജനിച്ചു വളർന്ന ഇവർക്ക് സാങ്കേതികവിദ്യ പ്രധാനപ്പെട്ടതാണെന്നും പറഞ്ഞ മുഖ്യമന്ത്രി, റോബോട്ടിക്സ്, ഡാറ്റാസയൻസ്, ഇന്റർനെറ്റ് ഓഫ് തിങ്സ്, വെർച്വൽ റിയാലിറ്റി മുന്നേറ്റങ്ങൾ ഏറ്റവും വേ​ഗത്തിൽ സ്വീകരിക്കുന്നവരും പ്രയോജനപ്പെടുത്തുന്നവരും ഇവരാണെന്ന് പരാമർശിച്ചു.