ഇടുക്കി: ഇടുക്കി കരിമ്പനിൽ ഗ്യാസ് സിലിണ്ടർ പൊട്ടിത്തെറിച്ച് അമ്മയ്ക്കും മകനും ഗുരുതരമായി പരിക്ക്. കരിമ്പൻ സ്വദേശികളായ കൊട്ടാരത്തിൽ ജസ്റ്റിൻ ജോസ് (37)നും അമ്മ ജോളി ജോസിനുമാണ് പരിക്കേറ്റത്. ഇന്നലെ രാത്രി 9.15ഓടെയാണ് അപകടം നടന്നത്. പുതിയ സിലിണ്ടർ കണക്ട് ചെയ്യുന്നതിനിടെ തീ പടർന്നതാണ് അപകടത്തിന് കാരണമെന്നാണ് പ്രാഥമിക വിവരം. ഗുരുതരമായി പരിക്കേറ്റ ഇരുവരെയും കോട്ടയം മെഡിക്കൽ കോളേജിലേക്ക് മാറ്റി. അപകടത്തിൽ വീടിന്റെ അടുക്കളയും മറ്റൊരു മുറിയും പൂർണ്ണമായും തകർന്നു.