അമേരിക്കയിൽ ഉപരിപഠനവും മികച്ച ജോലിയും ഒപ്പം സ്ഥിരതാമസവും സ്വപ്നം കാണുന്ന ലക്ഷക്കണക്കിന് ഇന്ത്യക്കാരുടെ പ്രതീക്ഷകൾക്ക് മേൽ കരിനിഴൽ വീഴ്ത്തി ട്രംപ് ഭരണകൂടത്തിന്റെ പുതിയ വിസ പരിഷ്കാരങ്ങൾ വരുന്നു. ട്രംപ് സർക്കാരിന്റെ പുതിയ ‘യൂണിഫൈഡ് റെഗുലേറ്ററി അജണ്ട’ പ്രകാരം അന്താരാഷ്ട്ര വിദ്യാർത്ഥി വിസകളിലും (F-1), ഐടി മേഖലയിലുള്ളവർ പ്രധാനമായും ആശ്രയിക്കുന്ന എച്ച്-1ബി (H-1B) വിസകളിലുമാണ് കടുത്ത നിയന്ത്രണങ്ങൾ ഏർപ്പെടുത്തുന്നത്. 2026 ഓഗസ്റ്റ് മുതൽ ഈ പരിഷ്കാരങ്ങൾ ഘട്ടങ്ങളായി നടപ്പിലാകുമെന്നാണ് റിപ്പോർട്ടുകൾ.
യുഎസിലെ എച്ച്-1ബി വിസകളിൽ 70 ശതമാനവും കൈവശം വെക്കുന്നത് ഇന്ത്യൻ ഐടി പ്രൊഫഷണലുകളാണ്. കൂടാതെ 3.5 ലക്ഷത്തിലധികം ഇന്ത്യൻ വിദ്യാർത്ഥികളും അവിടെ പഠിക്കുന്നുണ്ട്. അതിനാൽ തന്നെ ഈ നിയമമാറ്റങ്ങൾ ഏറ്റവും മാരകമായി ബാധിക്കുക ഇന്ത്യൻ സമൂഹത്തെയായിരിക്കും.
പുതിയ വിസ പരിഷ്കാരങ്ങൾ എന്തൊക്കെയാണെന്നും അവ വിദ്യാർത്ഥികളെയും ഉദ്യോഗസ്ഥരെയും എങ്ങനെയെല്ലാം ബാധിക്കുമെന്നും വിശദമായി പരിശോധിക്കാം:
- അന്താരാഷ്ട്ര വിദ്യാർത്ഥികൾക്ക് (F-1) കടുത്ത നിബന്ധനകൾ
ഇന്ത്യൻ വിദ്യാർത്ഥികൾക്ക് യുഎസിൽ തുടരുന്നതിനും പഠനം പൂർത്തിയാക്കുന്നതിനും വലിയ പ്രതിബന്ധങ്ങൾ സൃഷ്ടിക്കുന്നതാണ് പുതിയ നിർദ്ദേശങ്ങൾ.
ഡ്യൂറേഷൻ ഓഫ് സ്റ്റേറ്റസ്’ നിർത്തലാക്കുന്നു: മുൻപ് യുഎസിൽ ഒരു കോഴ്സിന് ചേരുന്ന വിദ്യാർത്ഥിക്ക് പഠനം തുടരുന്നിടത്തോളം കാലം നിയമപരമായി അവിടെ തുടരാമായിരുന്നു. എന്നാൽ ഇനി മുതൽ അന്താരാഷ്ട്ര വിദ്യാർത്ഥികൾക്ക് പരമാവധി 4 വർഷത്തെ വിസ മാത്രമേ ലഭിക്കൂ.
വിസ നീട്ടാൻ ഭീമമായ തുക: ഡ്യുവൽ ഡിഗ്രിയോ പിഎച്ച്ഡിയോ ചെയ്യുന്ന വിദ്യാർത്ഥികളുടെ കോഴ്സ് 4 വർഷത്തിന് മുകളിൽ നീണ്ടുപോയാൽ, യുഎസ് ഇമിഗ്രേഷൻ അതോറിറ്റിക്ക് (USCIS) വലിയ തുക ഫീസ് നൽകി, ബയോമെട്രിക്സും സാമ്പത്തിക ഭദ്രതയും വീണ്ടും തെളിയിച്ച് വിസ നീട്ടിയെടുക്കേണ്ടി വരും.
ഗ്രേസ് പിരീഡ് വെട്ടിച്ചുരുക്കി: പഠനം കഴിഞ്ഞതിനു ശേഷം നാട്ടിലേക്ക് മടങ്ങാനോ മറ്റ് വിസകളിലേക്ക് മാറാനോ മുൻപ് 60 ദിവസത്തെ സമയം ലഭിച്ചിരുന്നത് ഇനി 30 ദിവസമായി കുറയും.
തുടർപഠനത്തിനുള്ള വഴി അടയുന്നു: എച്ച്-1ബി വിസ ലോട്ടറി അടിക്കാത്ത വിദ്യാർത്ഥികൾ യുഎസിൽ തുടരാൻ വേണ്ടി സാധാരണയായി ചെയ്യാറുള്ള രണ്ടാമതൊരു മാസ്റ്റേഴ്സ് കോഴ്സ് ചെയ്യാനുള്ള വഴികൾ പുതിയ ടേം ക്യാപുകൾ വരുന്നതോടെ പൂർണ്ണമായി അടയും.
OPT പ്രതിസന്ധി: പഠനശേഷം യുഎസിൽ ജോലി ചെയ്യാൻ അനുവാദം നൽകുന്ന ഒപ്റ്റി (OPT) കാലാവധിയിലും 2027 ഫെബ്രുവരിയോടു കൂടി കടുത്ത നിയന്ത്രണങ്ങൾ വരുത്താനാണ് നീക്കം. ഇത് ലക്ഷക്കണക്കിന് വിദ്യാർത്ഥികളുടെ വിദ്യാഭ്യാസ വായ്പ തിരിച്ചടവിനെപ്പോലും പ്രതിസന്ധിയിലാക്കും.
- എച്ച്-1ബി (H-1B) വിസകളിലെ മാറ്റങ്ങളും ഐടി മേഖലയിലെ പ്രതിസന്ധിയും
ഇന്ത്യൻ ഐടി കമ്പനികളുടെയും പ്രൊഫഷണലുകളുടെയും നട്ടെല്ലൊടിക്കുന്നതാണ് എച്ച്-1ബി വിസയിലെ പുതിയ പരിഷ്കാരങ്ങൾ.
കുറഞ്ഞ ശമ്പള പരിധി ഉയർത്തുന്നു: എച്ച്-1ബി ജീവനക്കാർക്ക് നൽകേണ്ട കുറഞ്ഞ ശമ്പള പരിധി യുഎസ് തൊഴിൽ വകുപ്പ് വൻതോതിൽ വർദ്ധിപ്പിക്കും. എൻട്രി ലെവൽ ശമ്പളം 17-ാം പെർസെന്റൈലിൽ നിന്നും 34-ാം പെർസെന്റൈലിലേക്ക് ഉയർത്താനാണ് നീക്കം. ഇതോടെ ഇന്ത്യൻ ഐടി തുടക്കക്കാരെ കുറഞ്ഞ ശമ്പളത്തിൽ ജോലിക്ക് വെക്കാൻ യുഎസ് കമ്പനികൾക്ക് സാധിക്കില്ല.
തേർഡ് പാർട്ടി സൈറ്റ് നിയന്ത്രണം: ടിസിഎസ്, ഇൻഫോസിസ്, കോഗ്നിസെന്റ് തുടങ്ങിയ വലിയ ഇന്ത്യൻ ഐടി കൺസൾട്ടിങ് കമ്പനികൾ തങ്ങളുടെ ജീവനക്കാരെ ക്ലയന്റുകളുടെ ഓഫീസുകളിലിരുത്തി ജോലി ചെയ്യിപ്പിക്കുന്ന രീതിക്ക് മേൽ കർശന നിയന്ത്രണങ്ങൾ വരും.
ഡ്രോപ്പ് ബോക്സ് സൗകര്യം നിർത്തലാക്കി: വിസ പുതുക്കാൻ ഇന്ത്യക്കാർക്ക് വിസ ഇന്റർവ്യൂ ഇല്ലാതെ രേഖകൾ സമർപ്പിക്കാനുള്ള ഡ്രോപ്പ് ബോക്സ് സൗകര്യം നിർത്തലാക്കി. എല്ലാവർക്കും ഇൻ-പേഴ്സൺ ഇന്റർവ്യൂ നിർബന്ധമാക്കിയതോടെ ഇന്ത്യൻ കോൺസുലേറ്റുകളിൽ വലിയ തോതിലുള്ള അപ്പോയിന്റ്മെന്റ് കാത്തിരിപ്പ് സമയമാണ് അനുഭവപ്പെടുന്നത്.
വിവാദ വിസ ഫീസ് കേസ്: പുതിയ എച്ച്-1ബി വിസ അപേക്ഷകൾക്ക് 100,000 ഡോളർ ഫീസ് ഏർപ്പെടുത്താനുള്ള ട്രംപ് സർക്കാരിന്റെ തീരുമാനം മുൻപ് കോടതി റദ്ദാക്കിയിരുന്നു. എന്നാൽ ഈ വിധിക്കെതിരെ ട്രംപ് ഭരണകൂടം ഇപ്പോൾ വീണ്ടും അപ്പീൽ നൽകിയിരിക്കുകയാണ്.
- കുടുംബങ്ങളെ ബാധിക്കുന്ന എച്ച്-4 (H-4) വിസ പ്രതിസന്ധി
ഓട്ടോമാറ്റിക് എക്സ്റ്റൻഷൻ നിർത്തലാക്കുന്നു: എച്ച്-1ബി വിസക്കാരുടെ പങ്കാളികൾക്ക് യുഎസിൽ ജോലി ചെയ്യാനുള്ള പെർമിറ്റാണ് എച്ച്-4 ഇഎഡി (H-4 EAD). ഇതിന്റെ ഓട്ടോമാറ്റിക് എക്സ്റ്റൻഷൻ (ആനുകൂല്യം നീട്ടിനൽകൽ) നിർത്തലാക്കാൻ ട്രംപ് ഭരണകൂടം പദ്ധതിയിടുന്നു.
ജോലി നഷ്ടപ്പെടാൻ സാധ്യത: യുഎസിലെ ഇമിഗ്രേഷൻ വകുപ്പിന്റെ അപേക്ഷകൾ കൈകാര്യം ചെയ്യാനുള്ള കാലതാമസം കാരണം വിസ പുതുക്കൽ പലപ്പോഴും 6 മാസത്തിലധികം നീണ്ടുപോകാറുണ്ട്. ഓട്ടോമാറ്റിക് എക്സ്റ്റൻഷൻ ഇല്ലാതാകുന്നതോടെ വിസ പുതുക്കി കിട്ടുന്നത് വരെ ഇന്ത്യൻ സ്ത്രീകൾക്ക് ജോലി ചെയ്യാനാകില്ല. ഇത് പലരുടെയും ജോലി നഷ്ടപ്പെടുന്നതിനും ഡ്രൈവിങ് ലൈസൻസ് റദ്ദാകുന്നതിനും കാരണമാകും.
- ഗ്രീൻ കാർഡ് എന്ന അടഞ്ഞ വഴി
വർഷങ്ങളായി യുഎസിൽ ജോലി ചെയ്ത് സ്ഥിരതാമസത്തിനുള്ള ഗ്രീൻ കാർഡിനായി കാത്തിരിക്കുന്ന ലക്ഷക്കണക്കിന് ഇന്ത്യക്കാർക്ക് മുന്നിൽ വലിയൊരു കെണിയാണ് പുതിയ നിയമങ്ങൾ ഒരുക്കുന്നത്.
ഇബി-2 (EB-2) വിസ മരവിപ്പിച്ചു: ഇന്ത്യക്കാർക്കായുള്ള ഇബി-2 വിസ കാറ്റഗറി സാമ്പത്തിക വർഷത്തിന്റെ ബാക്കി കാലയളവിലേക്ക് പൂർണ്ണമായും അൺഅവൈലബിൾ (Unavailable) ആയി പ്രഖ്യാപിച്ചിരിക്കുകയാണ്. ഇതോടെ ഈ വിഭാഗത്തിലെ ഗ്രീൻ കാർഡ് അംഗീകാരം നൽകൽ പൂർണ്ണമായി മരവിച്ചു.
നാട്ടിലിരുന്ന് കാത്തിരിക്കേണ്ടി വരും: ഏറ്റവും അപകടകരമായ പോളിസി മാറ്റം, ഗ്രീൻ കാർഡ് അപേക്ഷ നൽകി യുഎസിനുള്ളിൽ തന്നെ എച്ച്-1ബി വിസയിൽ തുടരാൻ അനുവദിക്കുന്ന രീതി മാറ്റുന്നതാണ്. ഗ്രീൻ കാർഡിനായുള്ള നീണ്ട കാത്തിരിപ്പ് കാലയളവ് ഇന്ത്യക്കാർക്ക് യുഎസിന് പുറത്തുപോയി സ്വന്തം നാട്ടിലിരുന്ന് കാത്തിരിക്കേണ്ടി വരുന്ന തരത്തിലുള്ള കടുത്ത നിയമങ്ങളാണ് സർക്കാർ ആലോചിക്കുന്നത്.
പുതിയ യുഎസ് വിസ പരിഷ്കാരങ്ങൾ നടപ്പിലാകുന്നതോടെ ഉപരിപഠനത്തിനും കരിയർ വളർച്ചയ്ക്കുമായി അമേരിക്കയെ ലക്ഷ്യമിടുന്ന ഇന്ത്യൻ പ്രവാസികളുടെയും വിദ്യാർത്ഥികളുടെയും വഴി കൂടുതൽ ദുഷ്കരമാകുമെന്നുറപ്പാണ്.
