തിരുവനന്തപുരം: കള്ള് ഷാപ്പുകളിൽ ഭക്ഷണം വിതരണം ചെയ്യുന്നതിന് ഭക്ഷ്യസുരക്ഷാ ലൈസൻസ് നിർബന്ധമാക്കി എക്സൈസ് വകുപ്പ്. ലൈസൻസ് ഇല്ലാതെ ഭക്ഷണം വിളമ്പുന്ന ഷാപ്പുകൾക്കെതിരെ കർശന നടപടി സ്വീകരിക്കുമെന്ന് എക്സൈസ് അധികൃതർ അറിയിച്ചു.നിയമലംഘനം കണ്ടെത്തിയിട്ടും നടപടി എടുക്കാതെ വീഴ്ച വരുത്തുന്ന ഉദ്യോഗസ്ഥർക്കെതിരെയും ശിക്ഷാ നടപടി ഉണ്ടാകുമെന്ന് എക്സൈസ് കമ്മീഷണർ മുന്നറിയിപ്പ് നൽകി.
‘ഓപ്പറേഷൻ ശുദ്ധി’യുടെ ഭാഗമായാണ് പുതിയ നടപടി. ഷാപ്പുകളിലെ ഭക്ഷണത്തിന്റെ ഗുണനിലവാരവുമായി ബന്ധപ്പെട്ട് നിരവധി പരാതികൾ ഉയർന്ന സാഹചര്യത്തിലാണ് നടപടി ശക്തമാക്കിയത്.
ഭക്ഷ്യസുരക്ഷാ ലൈസൻസുമായി ബന്ധപ്പെട്ട് നേരത്തെ തന്നെ എക്സൈസ് വകുപ്പ് നിർദേശം നൽകിയിരുന്നു. എന്നാൽ പല ഷാപ്പുകളും ഇത് പാലിക്കാത്ത സാഹചര്യത്തിലാണ് പുതിയ ഉത്തരവ് പുറത്തിറക്കിയത്.
